Torino ka dalë me tri pikë të arta nga transferta ndaj Sassuolos, duke fituar minimalisht 1-0 në ndeshjen e vlefshme për javën e 16-të të Serie A, të zhvilluar në “Mapei Stadium”. Një duel i ekuilibruar, i vendosur nga një episod i vetëm, por vendimtar.
Goli i fitores erdhi nga pika e bardhë, me Vlasic që u tregua i saktë në ekzekutimin e penalltisë, duke i dhënë suksesin skuadrës së tij. Falë kësaj fitoreje, Torino ngjitet në kuotën e 20 pikëve, duke iu afruar ndjeshëm Sassuolos, që mbetet në 21.
Vëmendje të veçantë mori edhe prania e futbollistëve shqiptarë në fushë. Te Sassuolo u aktivizua portieri i Kosovës, Muriç, ndërsa te Torino luajtën dy përfaqësues të Kombëtares shqiptare, Ardian Ismajli dhe Kristjan Asllani.
Pas përfundimit të takimit, Sofascore publikoi vlerësimet individuale, ku Muriç ishte lojtari më i vlerësuar i Sassuolos me notën 7.5. Te Torino, Ismajli u dallua me notën 7, ndërsa Asllani u vlerësua me 6.7, duke konfirmuar një paraqitje solide të lojtarëve shqiptarë.
