Humbja në shtëpi ndaj Manchester City-t ka kthyer tensionin në “Santiago Bernabéu” dhe ka shfaqur një figurë që nuk kaloi pa u vënë re: Zinedine Zidane. Ish-trajneri i Real Madridit u pa në tribunën VIP gjatë rënies së skuadrës së Xabi Alonsos, një detaj që menjëherë ndezi spekulimet për një rikthim të mundshëm të tij në stol.
Në Spanjë flitet hapur për një situatë shumë të brishtë. Statistikat nuk i falin askujt: vetëm dy fitore në tetë ndeshjet e fundit dhe një ecuri alarmante në La Liga, me katër humbje në pesë takime. Drejtuesit madrilenë, sipas burimeve të afërta me klubin, i kanë vendosur trajnerit spanjoll një ultimatum të qartë: sfida e së dielës në transfertë ndaj Alavés do të jetë vendimtare. Pa fitore, shkarkimi mund të bëhet realitet para Krishtlindjeve.
Pavarësisht bujës që krijoi prania e tij, rikthimi i francezit nuk shihet si skenar i afërt. Zizu ka synime të tjera: pas Kupës së Botës 2026 ai pritet të jetë kandidati kryesor për të pasuar Didier Deschamps në stolin e Francës, dhe kjo është arsyeja pse një rikthim te Real Madridi, të paktën tani, mbetet shumë i vështirë.
Nëse aventura e Xabi Alonsos mbyllet, Real Madridi ka gati lëvizjen e radhës. Emri që qarkullon më fort është ai i Álvaro Arbeloas, aktualisht trajner i Castillas. Ai shihet si profili ideal për të marrë drejtimin deri në fund të sezonit. Një tjetër pistë e mundshme është Santiago Solari, që mund të rikthehet si zgjidhje e përkohshme.