Pas mesnatës, Justina Shiroka-Pula është votuar me 81 vota nga Kuvendi, si presidentja e re e Kosovës. Ajo ka marrë votat e mjaftueshme në seancën e jashtëzakonshme të mbajtur në Kuvendin e Kosovës. Shiroka-Pula, ish-ministre e Partisë Demokratike të Kosovës, u propozua për Presidente nga kryeministri Albin Kurti. Me zgjedhjen e saj, Kuvendi ka përmbyllur procesin e zgjedhjes së Presidentes së re të Kosovës.
Me zgjedhjen e presidentes, Kosova u ka shpëtuar edhe një palë zgjedhjeve parlamentare. Në rast se nuk do të zgjidhej presidentja në momentet e fundit, Kosova do të shkonte në zgjedhjet e katërta parlamentare brenda katër vjetësh. Mirëpo, në fund u arrit pajtimi mes VV-së dhe PDK-së dhe Justina Shiroka Pula u zgjodh presidente e vendit.
Presidentja është ekonomiste dhe akademike, e cila ka ushtruar edhe funksione politike e institucionale. Shiroka-Pula në vitin 2025 është zgjedhur kryetare e Akademisë së Shkencave dhe Arteve të Kosovës (ASHAK), duke u bërë gruaja e parë që udhëheq këtë institucion, të themeluar në vitin 1975. Në këtë detyrë ajo pasoi akademikun Mehmet Kraja.
Ajo shkollimin fillor dhe të mesëm e ka përfunduar në Prishtinë, ndërsa në vitin 1976 ka diplomuar në Fakultetin Ekonomik të Universitetit të Prishtinës. Studimet pasuniversitare në fushën e teorisë dhe politikës së zhvillimit ekonomik i ka përfunduar në vitin 1984 në Fakultetin e Shkencave Ekonomike të Universitetit të Zagrebit. Shiroka-Pula ka kryer doktoraturën në Universitetin e Prishtinës me tezën e doktoratës me titull “Investimet demografike dhe zhvillimi ekonomik i Kosovës”.
Karrierën profesionale e ka nisur në Bankën Popullore të Kosovës, ndërsa në vitin 1978 ka filluar punën si ligjëruese në Fakultetin Ekonomik. Sipas biografisë së publikuar nga ASHAK, ajo ka ndjekur edhe studime pasdoktorale në Universitetin e Linzit në Austri dhe në Universitetin e Arizonës në Shtetet e Bashkuara të Amerikës, si dhe ka kryer trajnime të ndryshme profesionale në universitete të ndryshme ndërkombëtare. Pas përfundimit të luftës, Shiroka-Pula është angazhuar edhe në shoqërinë civile, kryesisht në fushën e fuqizimit të grave, barazisë gjinore, zhvillimit të bizneseve dhe ndërmarrësisë.
Shiroka-Pula ka shërbyer si ministre e Energjisë dhe Minierave të Kosovës nga viti 2008 deri në vitin 2011. Më pas, nga viti 2011 deri në vitin 2014, ka qenë deputete e Kuvendit të Kosovës. Tashmë, emri i saj është propozuar nga kryeministri Albin Kurti për postin e presidentes së Republikës së Kosovës, në kuadër të përpjekjeve për zgjedhjen e kreut të ri të shtetit.
Lexoni edhe:
Pritet të nisë seanca në Kuvend, PDK pranon kandidaten e Kurtit për Presidente
Ish-ministre e Thaçit, ja kush është kandidatja e propozuar nga Albin Kurti për presidente