Ramush Haradinaj ka kritikuar kryeministrin Albin Kurti për situatën e krijuar rreth zgjedhjes së presidentit dhe miratimit të Ligjit për Dhomat e Specializuara. Haradinaj tha se deklarata e Kurtit, sipas së cilës miratimi i presidentit do t’i hapte rrugë votimit të ligjit për Dhomat e Specializuara, e ka futur në ngërç procesin dhe sipas tij po e afron vendin me zgjedhje të reja.
Ai e konsideroi të papranueshme që ligji të mbetet pa u përfunduar, duke theksuar se ai është votuar në lexim të parë nga 91 deputetë të kësaj legjislature. “Është e pandershme të lihet në gjysmë ky ligj duke e ditur momentin kritik për mbrojtjen e liderëve të UÇK-së”, deklaroi Haradinaj. Sipas tij, në vend të përfundimit të procesit legjislativ, Kurti ka krijuar një situatë që, nëse nuk zgjidhet presidenti, mund ta çojë Kosovën drejt zgjedhjeve.
Haradinaj e akuzoi kryeministrin se me këtë qasje i ka shkaktuar dëm edhe procesit që lidhet me Dhomat e Specializuara. “Kurti e futi në kurth edhe ligjin, edhe vendin. Kurti i dha një goditje të rëndë UÇK-së duke e lënë në gjysmë Ligjin për Dhomat e Specializuara në momentin më kritik dhe po e çon vendin në zgjedhje”, tha ai. Haradinaj shtoi se kjo do të ishte hera e katërt që Kurti e çon vendin në zgjedhje, duke pretenduar se zgjedhjet e mëparshme kanë lënë qytetarët pa zgjidhje për çështjet kryesore të vendit.
