Sherri në Kuvend, PDK akuzon Kurtin për bllokimin e institucioneve: Republika është mbi secilin prej nesh

Kuvendi i Kosovës vijon të mbetet i pakonstituuar dhe tensionet mes opozitës dhe Lëvizjes Vetëvendosje u shoqëruan edhe me përplasje fizike e verbale në sallë, Partia Demokratike e Kosovës akuzoi kryeministrin në detyrë, Albin Kurti se po bllokon konstituimin e institucioneve.

Ajo i bëri thirrje kreut të Vetëvendosjes që të lejojë konstituimin e Kuvendit dhe funksionimin normal të institucioneve, duke theksuar se Kosova ka nevojë për institucione funksionale dhe jo për tensione të reja.

“E kemi një thirrje për Albin Kurtin: ta kthejë vendin në binarë kushtetues, ta konstituojmë Kuvendin, t’u lejojë deputetët të ushtrojnë funksionet e tyre, ta lë Republikën që të funksionojë. S’po kërkojmë marrëveshje për PDK’në, po kërkojmë funksionalizimin e shtetit. Mesazhi ynë është i thjeshtë: Albin Kurti dhe Lëvizja Vetëvendosje duhet të reflektojnë. Republika është mbi secilin prej nesh, Kushtetuta është mbi çdo parti. Të bisedojmë nga kjo shtëpi me një ftesë të drejtpërdrejtë: Ejani në Kuvend, ejani t’i konstituojmë Kuvendin”, tha deputetja e PDK-së, Vlora Çitaku në një konferencë për shtyp.

Ajo sqaroi e partia e saj do t’i drejtohet Inspektoratit Policor të Kosovës, pasi pretendon se pjesëtarë të sigurisë së afërt që shoqëronin deputetë të Vetëvendosjes kanë cenuar integritetin fizik të disa deputetëve të PDK-së. Çitaku tha se PDK kishte kërkuar zyrtarisht një ditë më parë vazhdimin e seancës konstituive, por akuzoi kryesuesin e seancës, Avni Dehari, se po refuzon ta thërrasë atë në përputhje me Kushtetutën, aktgjykimet dhe Rregulloren e Kuvendit.