Ngjarje e rëndë në Itali/ Shqiptari vret me kosore ish-bashkëshorten dhe partnerin e saj

Një ngjarje e rëndë ka tronditur një komunitet të vogël në veri të Italisë, ku një 59-vjeçar shqiptar dyshohet se vrau ish-bashkëshorten dhe partnerin e saj të ri, përpara se t’i jepte fund jetës në mënyrë tragjike.

Ngjarja ndodhi në Cossombrato, një fshat me rreth 500 banorë. Sipas të dhënave paraprake, autori i dyshuar, A. Koni, i njohur në zonë edhe si Arturo, kishte tentuar disa herë të rikthente marrëdhënien me ish-bashkëshorten e tij, D. Koni, por pa sukses.

Hetimet paraprake tregojnë se gruaja kishte nisur një lidhje të re, çka dyshohet se ka nxitur reagimin e dhunshëm të 59-vjeçarit. I armatosur me një kosore, mjet pune që përdorte zakonisht, ai ka sulmuar për vdekje ish-bashkëshorten dhe partnerin e saj. Trupat e pajetë të viktimave u gjetën më pas në një zonë fushore pranë fshatit.

Pas krimit të dyfishtë, autori është larguar drejt kalasë mesjetare të Kalaja e Cossombratos, ku punonte si kopshtar. Duke përfituar nga fakti që kishte çelësat e objektit, ai ka hyrë pa u vënë re dhe është vetë-hedhur nga lartësia, duke humbur jetën në vend.

Ngjarja ka shkaktuar tronditje të madhe në komunitetin lokal, ku autori përshkruhej nga banorët si një person punëtor dhe i qetë.