10 vite besueshmëri dhe sukses: Udhëtimi i Newsbomb.al në gazetarinë shqiptare

Sot mbush 10 vite një media e re, e lindur në vitet e dixhitalizimit, por me shpirt të kohëve kur bëhej duel me pushtetin e ku kuraja përshkonte si shtylla kurrizore çdo shkrim, të cilin lexuesi e merrte si ilaç shërimi ndër vitet kur të ishe gazetar apo gazetare në KOHA JONË ishte të merrje parasysh edhe vdekjen.

Kjo media e cila sot ka 10-vjetorin e saj quhet Newsbomb.al dhe ka si botuese e si drejtuese ANILA BASHËN.

Nila, siç i thërrasin për shkurt kolegët, vjen nga shkolla e KOHA JONË, e vitit 1997.

Nila mori intervistën e parë kryeministrit të Qeverisë së Stabilitetit, Bashkim Fino në prill 1997, asokohe kur shkrumbi i djegies së redaksisë së gazetës ndihej edhe në kryeministri e sidomos te Presidenca e Sali Berishës.

Ndërkohë 10 vite më parë, pas eksperiencave të vyera në KOHA JONË e në GAZETA SHQIPTARE, Nila krijoi median NEWSBOMB.AL.

Në këto 10 vite, Nila ia ka dalë të luftojë në detin e madh të portaleve, e ku anija e saj Newbomb.al lundron e fortë mes dallgëve dixhitake të medias së kohës.

Nila, përveç portalit mediatik boton edhe revistën me të njëjtin emër, çka për shumëkënd mbetet një aventurë e parealizueshme, por ajo ia ka dalë të bëjë revistën më të mirë, pothuaj te të gjitha kohërave.

Aq me tepër se sot botuesit dhe mediat e kanë lodhje dhe ngarkesë të botosh revistë, por Nila Basha ka bërë mrekullinë.
Revista e saj kërkohet kudo dhe përçon mesazhin se media klasike nuk ka vdekur. Mjafton pasion, profesionalizëm dhe paksa dëshirë për aventurë, dhe REALIZOHET.