5 mijë raketa mbi tokën izraelite/Izraeli është “në luftë” pas sulmit në shkallë të gjerë nga Hamasi

Kryeministri izraelit, Benjamin Netanyahu, tha se Izraeli është “në luftë” me militantët e Hamasit që kontrollojnë Rripin e Gazës. Komentet e Kryeministrit Netanyahu në një fjalim televiziv pasuan një sulm në shkallë të gjerë të Hamasir ndaj Izraelit në agimin e së shtunës. Zoti Netanyahu urdhëroi mobilizimin e rezervistëve dhe u zotua se Hamasi “do të paguante një çmim që nuk e ka njohur deri më tani”.

“Ne jemi në luftë”, tha zoti Netanyahu. “Jo në një ‘operacion’, jo në një ‘raund’, por në luftë”.

Kryeministri urdhëroi gjithashtu ushtrinë të spastrojë qytetet nga militantët e infiltruar të Hamasit.

Hamasi goditi Izraelit me mijëra raketa të shtunën ndërsa dhjetëra luftëtarë kaluan kufirin e fortifikuar, në një shfaqje masive të forcës që e kapi Izraelin të papërgatitur.

Shërbimet e urgjencës thonë se të paktën 22 izraelitë janë vrarë dhe qindra janë plagosur gjatë sulmit palestinez.

Ushtria izraelite tha se u kundërpërgjigj me sulme ajrore në Gaza, ku dëshmitarët raportuan për shpërthime të forta dhe për të vrarë.

Komandanti ushtarak i Hamasit, Mohammad Deif, njoftoi fillimin e operacionit në një transmetim në mediat e grupit, duke u bërë thirrje për luftë të gjithë palestinezëve kudo që ndodhen.

“Kjo është dita e betejës më të madhe për t’i dhënë fund pushtimit të fundit në tokë,” tha ai, duke shtuar se ishin hedhur 5000 raketa mbi Izraelin.

Sulmi i së shtunës u përshëndet nga Irani dhe grupi militant Hezbollah, ndërsa u dënua gjerësisht nga diplomacia perëndimore.

Shpërthimi i fundit i madh i dhunës midis Izraelit dhe Hamasit ndodhi gjatë luftës 10 ditëshe në vitin 2021.