Lëkundje të forta tërmeti në Durrës dhe Tiranë. IGJEUM: 4.9 ballë
Lëkundje të forta tërmeti janë ndjerë në Tiranë, rreth orës 21:15. Sipas të dhënave paraprake të institutit gjerman GFZ, tërmeti ka qenë i 5.1 ballë i shkallës rihter.
Ndërkohë Ministria e Mbrojtjes ka njoftuar sot në mbrëmje se lëkundjet e tërmetit që u ndjejnë në Tiranë ishin me magnitude 4.9 dhe epiqendër 3 kilometra afër fshatit Bubq.
Ministria e Mbrojtjes u referohet të dhënave paraprake të Institutit të Gjeoshkencave, Energjisë, Ujit dhe Mjedisit. Në njoftimin e IGJEUM thuhet se lëkundjet janë vijim i pasgoditjeve të tërmetit të 26 nëntorit që goditi Durrësin.
“Goditja kryesore e orës 21.15 me magnitudë 4.9 i shkalles rihter, me thellësi 7 km, me epiqendër në fshatin Bubq. Goditja është shoqëruar nga pasgoditje me të vogla, të cilat shoqërojnë aktivitetin sizmik të 26 Nëntorit”,- thuhet në njoftimin e Ministrisë së Mbrojtjes.
Ministria njofton se nga komunikimi me bashkitë Durrës, Dibër, Gjirokastër, Fier, Vlorë, Shkodër dhe Lezhë nuk raportohen dëme në njerëz apo materiale.
Ndërkohë, një pjesë e qytetarëve në Tiranë kanë dalë nga banesat, siç shihet edhe në videon më poshtë.