-Botuar në radion gjermane shtetrore DW-
Nëse Ukraina godet objektiva ruse me raketat gjermane Taurus, Moska do ta konsiderojë këtë si përfshirje të drejtpërdrejtë gjermane në luftë, kërcënon Moska.
Rusia reagon me kërcënim ndaj një dërgese të mundshme të raketave Taurus nga Gjermania në Ukrainë. Gjermania mund të bëhet kështu palë në luftë, tha zëdhënësja e Ministrisë së Jashtme ruse, Maria Zakharova në Moskë. Rusia, vendi që filloi një luftë agresioni kundër Ukrainës që nga shkurti i vitit 2022, e interpreton goditjen “me këto raketa kundër objekteve ruse (…) si një pjesëmarrje të drejtpërdrejtë të Gjermanisë në veprime luftarake” në anën e Ukrainës, u shpreh Zakharova për agjencitë ruse të lajmeve. Përdorimi i raketave Taurus “nuk është i mundur pa mbështetje të drejtpërdrejtë nga ushtarët e Bundeswehrit”, theksoi Zakharova.
Merz pro dërgimit të raketave Taurus në Ukrainë
Kancelari i ri i pritshëm, Friedrich Merz (CDU), është shprehur vazhdimisht në favor të furnizimit me raketa Taurus në Ukrainë, ndërsa partnerja e mundshme e koalicionit, SPD nuk e mbështet këtë. Merz ishte shprehur para disa ditësh për dërgimin e raketave Taurus, por në koordinim me partnerët evropianë. “Unë gjithmonë kam thënë se këtë do ta bëj vetëm në konsultim me partnerët e mi evropianë”, u shpreh Merz. Për Merz ushtria ukrainase duhet të dalë nga situata defensive, pasi “ajo gjithmonë vetëm reagon”. Për tre vjet ajo ka qenë në gjendje vetëm të reagojë dhe duhet “të jetë në gjendje të përcaktojë vetë një pjesë të zhvillimeve që po ndodhin”, kërkoi kandidati për kancelar. Kancelari në largim Olaf Scholz (SPD) nuk i pranoi kërkesat e Ukrainës për dërgimin e raketave Taurus, gjatë mandatit të tij në detyrë, me argumentin se kjo do të përfshinte Gjermaninë në luftë.
Rusia e ka kërcënuar edhe më parë Perëndimin për dërgimin e raketave amerikane ATACMS dhe raketave britanike “Storm Shadow” në Ukrainë. Pas përdorimit të parë të këtyre armëve në sulmet ndaj objektivave në Rusi, ushtria ruse gjuajti raketën e saj të re hipersonike Oreshnik në Ukrainë. Moska kërcënoi se do ta përdorte përsëri këtë tip rakete.