Shefi i bandës, roli që Edi Rama zgjodhi në filmin e Ermal Mamaqit (VIDEO)

Filmi i Ermal Mamaqit “I Love Tropoja”, që do të shfaqet këto ditë në kinema, bëri bujë për numrin e madh të aktorëve të njohur që morën pjesë në realizimin e tij.
Përveç aktorëve profesionistë, pjesë e filmit është dhe kryeministri i vendit, Edi Rama. Kreu i qeverisë ka pranuar të marrë pjesë në një film komik dhe ka zgjedhur rolin e dajës së dhëndrit, që luhet nga Ermal Mamaqi.
Ajo që bie në sy në skenat që kreu i qeverisë ka pranuar të marrë pjesë është se personazhi i dajës përfaqëson modelin e kapo bandës ose të fortëve që ndeshen shpesh në realitetin shqiptar.
“S’ka bir none dhe kurve ta martojë Landin me zor. Kush i bën presion çunit tonë këtu?!”, është batuta e Ramës në rolin e dajës së frikshëm.
Kryeministri shfaqet në skenën e filmit i rrethuar me truproja të veshur si mafiozë me kostume dhe syze të errëta. Prototipi i zgjedhur nga kreu i qeverisë është shumë afër modeleve të shefave të bandave.
Kryeministri është marrë personalisht me kurimin e rolit të tij, që nga skenografia, makijazhi i frikshëm dhe deri të detajet e rojeve të armatosur që e shoqërojnë. Nuk dihet se përse mes shumë rolesh, kryeministri zgjodhi që të shfaqet si kreu i bandës, një akuzë që shpesh herë i është bërë nga opozita gjatë viteve që po drejton vendin.
Ky është debutimi i parë i kreut të qeverisë në artin e kinemasë. Gjatë kohës që ishte kryetar bashkie, Edi Rama prodhonte rregullisht, në çdo fushatë elektorale, videoklipe me këngëtarë të njohur, ku eksperimentonte si këngëtarë.