“Akullthyesit” pushtojnë skenën e “Skampës”, Elbasani mirëpret grupin që bëri jehonë ndër vite

Grupi legjendar elbasanas “Akullthyesit” është rikthyer në skenën e Teatrit “Skampa”, duke dhuruar një koncert të veçantë që solli emocione, nostalgji dhe kujtime për disa breza.

Me Ymer Ashikun në vokal, skena e “Skampës” u gjallërua nga energjia dhe interpretimi i një prej zërave më të njohur të grupit. Ashtu si në vitet e para të karrierës së tij, Ashiku pushtoi skenën me muzikën dhe interpretimin e tij, ndërsa publiku e mirëpriti me duartrokitje të gjata. Në një mbrëmje plot emocione, të pranishmit u ngritën në këmbë, duke kënduar dhe përjetuar nga afër këngët që kanë shënuar historinë e grupit.

Rikthimi i “Akullthyesve” në Elbasan ishte më shumë se një koncert. Ishte një takim me kujtesën muzikore të qytetit, me këngët që bënë jehonë ndër vite dhe që vazhdojnë të ruajnë lidhjen e fortë me publikun.

“Ne kemi qenë një grup që i kemi dhënë shumë qytetit dhe kjo është arsyeja pse njerëzit rikthehen te muzika jonë. Jam shumë i lumtur. Ishte një natë magjike. Sollëm muzikë të mirë, këngë me ndjenjë dhe tekste që prekin e përjetohen. Besoj se ky koncert do të mbahet mend gjatë”, u shpreh vokalisti Ymer Ashiku.

Edhe drejtori i Qendrës së Artit në Bashkinë Elbasan, Klinton Kapaj, e vlerësoi këtë rikthim si një moment krenarie për qytetin, duke vënë në dukje rëndësinë e trashëgimisë muzikore që grupi ka krijuar ndër vite.

“Akullthyesit” u krijuan në Elbasan në vitin 1989, me iniciativën e Bledi Shishmanit dhe Gentjan Haxhiademit. Me ndërthurjen e muzikës rock, teksteve të ndjera dhe stilit të tyre të veçantë, grupi fitoi shpejt vëmendjen e publikut, duke lënë gjurmë në jetën muzikore të qytetit.

Rikthimi në skenën e “Skampës” dëshmoi se muzika e tyre vazhdon të bashkojë breza dhe se Elbasani e mirëpret me krenari grupin që ka qenë pjesë e historisë së tij artistike. Miranda Sadiku