Me rastin e 155-vjetorit të lindjes së At Gjergj Fishtës, shkrimtarë, poetë dhe studiues u bënë bashkë në Lezhë, në edicionin e pestë të çmimeve letrare që mbajnë emrin e poetit kombëtar. Konkursi i këtij viti mblodhi 83 vepra nga autorë të trojeve shqiptare, të cilat garuan në tri kategori: poezi, prozë dhe përkthim. Një risi e këtij edicioni ishte çmimi “Gjurmë Fishtjane”, i krijuar për të promovuar veprat që ruajnë dhe përcjellin gjurmët e krijimtarisë dhe trashëgimisë së Fishtës.
Juria, e kryesuar nga shkrimtari Preç Zogaj dhe me anëtarë Suela Mino e Gani Mehmetaj, përzgjodhi krijimet më të spikatura të këtij edicioni. Çmimi “Gjurmë Fishtjane” iu akordua Zef Përgegës për librin “Epika Malësore”. Në kategorinë e poezisë, vlerësimi për vëllimin më të mirë poetik shkoi për Rudolf Markun, ndërsa Flutura Açka u shpall fituese për prozën më të mirë. Çmimi për përkthimin iu dha Agron Tufës për romanin “Gropa e themelit”.
Përtej vlerësimit të krijimtarisë bashkëkohore, aktiviteti synon të mbajë gjallë interesin për veprën e At Gjergj Fishtës dhe rolin e tij në zhvillimin e letërsisë shqipe, kulturës dhe identitetit kombëtar. Festimet në Lezhë, në përvjetorin e 155-të të lindjes së tij, shërbejnë gjithashtu si një hapësirë takimi për krijuesit dhe studiuesit, duke i dhënë vëmendje letërsisë shqipe dhe autorëve që kontribuojnë në pasurimin e saj.
