Në ditën e 129 të protestës, një prej protestuesve, Baxhul Merkaj, ngriti shqetësimin për nivelin e pensionit që merr pas dekadash punë. Merkaj i cili tregon se ka punuar që prej moshës 19-vjeçare dhe se ka kontribuar edhe në fushën e artit, deklaroi se sot merr vetëm 170 mijë lekë të vjetra pension. Për të kjo shumë nuk mjafton për të përballuar as shpenzimet më bazike të përditshmërisë, si faturat e ujit dhe energjisë elektrike.
“Kam një jetë që punoj dhe jap për artin. Kam punuar që 19 vjeç dhe marr 170 mijë lekë të vjetra pension. Këto nuk dalin as për të shlyer ujë e drita, nuk më dalin as për të pirë një kafe me miqtë”, u shpreh Merkaj. Ai tha gjithashtu se në llogaritjen e pensionit nuk i janë njohur 15 vite pune, duke pretenduar se gjatë kësaj periudhe ka qenë i punësuar.
Pensionisti bëri thirrje për ndryshim të situatës, duke e lidhur atë me nevojën për përparim dhe emancipim të shoqërisë. “Unë them se këtu duhet të ndryshojnë gjërat, ndryshimi është emancipim i shoqërisë. Ndryshimi është të ecësh përpara e jo mbrapa”, deklaroi ai. Protesta vijon prej 129 ditësh, ndërsa pensionistët kërkojnë përmirësimin e kushteve ekonomike dhe një rritje të të ardhurave të tyre.
