132 ditë protestë, Vatnikaj: Reforma e re territoriale një turp, nuk frikësohemi nga asnjë shantazh

Aktivistja Sidorela Vatnikaj, gjatë protestës së 132-të kundër qeverisë, kërkoi dorëheqjen e kryeministrit Edi Rama dhe kabinetit të tij, duke kritikuar ashpër reformën e re territoriale.

“Ky parlament nuk na përfaqëson më as interesat tona e as shqetësimet tona, por vepron sipas urdhrave të Edi Ramës”, deklaroi Vatnikaj.

Ajo e cilësoi miratimin e reformës territoriale si të turpshëm, duke theksuar se ajo shkrin 15 bashki dhe përqendron pushtetin në pak duar.

“Këtij pushteti korruptiv i ka ardhur fundi”, u shpreh aktivistja, duke akuzuar gjithashtu autoritetet për presion ndaj protestuesve.

Në përfundim, Vatnikaj theksoi se protestuesit nuk do të tërhiqen përballë shantazheve dhe presionit, duke përsëritur thirrjen për largimin e kryeministrit.

“Ne jemi këtu për të kërkuar dorëheqjen tënde dhe kabinetit tënd”, deklaroi ajo.