Ambasadorja De Sousa: BE vijon mbështetjen politike, teknike dhe financiare për 6 partnerët e Ballkanit Perëndimor

Zyra e delegacionit të Bashkimit Evropian në Tiranë theksoi sot se lidhjet më të forta mes vendeve të Ballkanit Perëndimor janë thelbësore për të ardhmen e rajonit në BE, duke forcuar njëkohësisht sigurinë dhe qëndrueshmërinë.

Në edicionin e 12-të të Forumit të Tiranës për Lidhjet Rajonale, organizuar nga Instituti për Bashkëpunim dhe Zhvillim, diskutimi u përqendrua te bashkëpunimi gjithnjë e më i ngushtë mes vendeve të Ballkanit Perëndimor dhe angazhimet e tyre për zbatimin e agjendave kombëtare të reformave në kuadër të Planit të ri të Rritjes (Growth Plan).

Mesazhi kryesor i forumit ishte se Shqipëria dhe rajoni po kalojnë nga faza e përgatitjes në atë të zbatimit konkret. Ambasadorja e Bashkimit Evropian në Shqipëri, Sofia Moreira de Sousa, theksoi se BE-ja do të vijojë mbështetjen për vendet e Ballkanit Perëndimor.

“BE-ja do të vazhdojë mbështetjen e saj të fortë politike, teknike dhe financiare për të gjashtë partnerët e Ballkanit Perëndimor, për t’i ndihmuar të çojnë përpara reformat kryesore politike, institucionale, sociale dhe ekonomike, të nevojshme për përparimin e tyre në rrugën drejt BE-së”, tha ambasadorja e BE-së, Sofia Moreira de Sousa.