Miratimi në Komisionin e Ligjeve i Konventës së Këshillit të Europës për mbrojtjen e profesionit të avokatëve u shoqërua me debate për konfliktin mes avokatëve dhe Gjykatës së Posaçme. Opozita kërkoi që qeveria dhe institucionet përgjegjëse të ndërhyjnë për zgjidhjen e situatës së krijuar pas rregullores së GJKKO-së për mënyrën e sjelljes së avokatëve në ambientet e Gjykatës.
Deputeti demokrat Arjan Ndoja ngriti pikërisht këtë shqetësim, duke pyetur nëse rregullorja e GJKKO-së është në përputhje me standardet e Konventës së Këshillit të Europës. Ministri i Drejtësisë, Toni Gogu, pranoi nevojën që standardet e konventës të reflektohen në të gjithë kuadrin ligjor dhe nënligjor, përfshirë edhe aktet që lidhen me organet e pavarura të drejtësisë.
Sipas Gogut, në rast se evidentohen mospërputhje, standardet e reja duhet të gjejnë pasqyrim në legjislacion. Nga ana tjetër, Ndoja këmbënguli se, nëse institucionet nuk arrijnë të gjejnë gjuhën e përbashkët, zgjidhja duhet kërkuar përmes ndryshimeve ligjore.
Debati u shtri edhe te roli i Kuvendit. Deputeti i Partisë së Lirisë, Tedi Blushi, akuzoi Ministrinë e Drejtësisë dhe Kuvendin se po heshtin përballë konfliktit mes GJKKO-së dhe Dhomës së Avokatisë.
Kreu i Komisionit të Ligjeve, Ulsi Manja, kundërshtoi këtë qasje, duke argumentuar se zgjidhja duhet të kërkohet përmes dialogut të drejtpërdrejtë mes Dhomës së Avokatisë dhe GJKKO-së.
Nga mazhoranca u theksua gjithashtu se Kuvendi nuk ka kompetencë të thërrasë drejtuesit e gjykatave për dëgjesa, ndërsa mund të kërkojë llogari nga institucionet përkatëse të sistemit të drejtësisë.
Pavarësisht debatit, ministri Gogu deklaroi se aktualisht nuk rezulton nevoja për ndryshime ligjore. Socialistët mbrojtën ndërkohë ndryshimet e bëra në Kodin e Procedurës Penale, duke argumentuar se ato kanë vendosur një raport më të barabartë mes avokatëve dhe prokurorëve.