”Do shfuqizojmë ligjin për investimet strategjike”, Rama për projektin e Kushnerit: Standardet e BE-së do të jenë kriteri, jo emrat e investitorëve

Lajme E Martë, 14 Korrik 2026 21:21

Kryeministri Edi Rama në përfundim të Konferencës së 9-të Ndërqeveritare Shqipëri-BE, nga Brukseli tha se Shqipëria po ecën sipas kalendarit të dakordësuar me Komisionin Europian për procesin e integrimit dhe se objektivi mbetet mbyllja e sa më shumë kapitujve negociues deri në fund të vitit. Duke folur për progresin e negociatave, Rama tha se tre kapituj janë mbyllur përkohësisht dhe se puna për kapitujt e tjerë po vijon me ritëm të lartë. Ai u shpreh optimist për ecurinë e procesit, duke theksuar se bashkëpunimi me Komisionin Europian dhe vendet partnere krijon mundësi për avancim të mëtejshëm. Lidhur me projektin turistik të mbështetur nga Jared Kushner dhe shqetësimet e ngritura në lidhje me standardet mjedisore, kryeministri deklaroi se çdo vendim do të merret në përputhje me rregullat e Bashkimit Europian. Sipas Ramës, projekti është ende në fazën e përgatitjes dhe vlerësimi i ndikimit në mjedis është në proces. Ai theksoi se emrat e investitorëve nuk duhet të ndikojnë në vlerësimin e projektit, ndërsa kriteri kryesor do të jenë standardet europiane.

Pyetjet nga gazetarët

Kryeministër Rama, tre kapituj janë mbyllur provizorisht. Cila është situata me 30 kapitujt e mbetur? Pra ku jemi, në gjendjen e progresit?

Kryeministri Edi Rama: Ajo çfarë është e rëndësishme është që deri më tani, jemi në drejtimin e duhur me kalendarin tejet ambicioz që është diskutuar e për të cilin është rënë dakord në ndërveprimin tonë të ndërsjellë me Komisionin dhe falë detyrave të pareshtura të shtëpisë që kemi bërë deri më tani. Thënë kjo, kalendari bëhet gjithmonë e më shumë ambicioz dhe ne duhet të punojmë gjithmonë e më tepër pa reshtur. Nëqoftëse atmosfera do të vazhdojë ajo çfarë kemi përjetuar gjatë kësaj periudhe të fundit, çdo gjë do të jetë aty ku duhet dhe çdo detyrë shtëpie do të bëhet si duhet. Nëqoftëse atmosfera do të ndryshojë, atëherë do të shohim, por deri tani nuk kemi arsye të besojmë se do të ketë një ndryshim atmosfere.

Dje në në takimin e Koalicionit të të Vullnetshëmve pati edhe një qasje, një këndvështrim për këtë proces, për vendet që janë në negociata aktive dhe mund të ndjeje lehtësisht, se te gjithë janë të prirur që të shtyjnë përpara dhe të gjithë janë të prirur të gjejnë mënyra edhe më të shpejta për ta mundësuar këtë. Kështu që jam shumë, shumë optimist në mënyrën shqiptare, që do të thotë, tragjikisht optimist.

Kështu që gati për të ecur përpara dhe për tu përballur edhe me sfida, nëqoftëse se shfaqen, por siç e thashë në fjalën hyrëse, presidenca irlandeze na jep komfort sepse Irlanda është një vend që ka dëshmuar përmes shembullit, se progresi eksponencial është i mundshëm dhe se irlandezët nuk pranojnë asgjë përveç ekselencës si objektiv. Pra, të jesh i shkëlqyer në objektivin e Presidencës, do të thotë të mund të mbyllësh më shumë kapituj me ne dhe me të tjerët deri në fund të vitit dhe ne ju besojmë miqve tanë irlandezë, punës që po bëjmë me Komisionin dhe kemi besim tek partnerët kështu që deri tani gjithçka mirë.

-Kryeministër thatë që nuk ka alternativë përkundrejt anëtarësimit në BE për Shqipërinë, por qeveria juaj ka mbështetur resortin luksoz, mbështetur nga Jared Kushner që ka sjellë shqetësime edhe në Bruksel për standardet mjedisore dhe për procesin e anëtarësimit të Shqipërisë. Si justifikoni mbështetjen e një projekti që Komisioni ka ngritur publikisht shqetësime sa i takon procesit të anëtarësimit.

Kryeministri Edi Rama: Nga vitet e gjata në detyrë kam mësuar që kur thua Bruksel, është një fjalë shumë komplekse, ka shumë organizma dhe ka shumë zëra në Bruksel. Për ne, të gjitha zërat në Bruksel janë mjaft të respektueshëm, por ka një fjalë që e marrim shumë seriozisht, që është zëri i Komisionit. Deri tani më duhet t’ju them se Komisioni është krye të gjithçkaje duke qenë shumë i mirë informuar, bazuar në fakte dhe arsyeja pse them gjithmonë, qysh prej një kohe të gjatë, që në këtë botë, informacioni apo sistemeve shume kaotikë informacioni dhe pikëpamjeve mjaft të debatueshme, ku e vërteta gjen gjithmonë e më pak hapësirë, e gënjeshtra dhe gjysmë të vërtetat e të vërtetat e rreme, gjejnë gjithmonë e më tepër hapësirë, Komisioni mbetet në fakt ai që mban fort objektivitetin sepse Komisioni punon bazuar në fakte, punon bazuar në të dhëna, punon bazuar në burime të verifikuara, ndaj jam i sigurtë që edhe ju nëqoftëse do të kishit interes për faktet, për të dhënat, për burimet e verifikuara, do të kuptonit se nuk ka asgjë për tu shqetësuar.

Projekti është ende punë në vazhdim. Projekti nuk është askund, nuk mund të shihet askund deri më tash sepse nuk është finalizuar dhe vlerësimi i ndikimit në mjedis është në proces e sipër. Gjithçka po bëhet sipas rregullave qysh prej ditës së parë, pavarësisht emrave. Përmendja e emrave nuk është diçka që na ndihmon për të shkuar tek e vërteta dhe kur them sipas rregullave, kam vetëm një libër rregullash që vlen për ne, që është ‘’libri’’ i rregullave të standardeve të anëtarësimit dhe ‘’libri’’ i rregullave të Komisionit të Bashkimit Europian. Pra ideja që Shqipëria do të vazhdonte përpara me diçka që nuk do të ishte në përputhje të plotë me ‘’librin e shenjtë’’ të besimtarëve dhe ateistëve në Shqipëri, që janë standardet e parimet e BE, është pretendim pa bazë, pra nuk ka asgjë për tu shqetësuar. Zero. Ne do të bëjmë një projekt që do të jetë krenari për Shqipërinë e për Europën. Kjo është ambicia ime. Shqipëria duhet ta bëjë realitet për veten dhe për Europën dhe sigurisht, në proces do të jemi siç kemi qenë deri tani, shumë rigorozë për të kërkuar asgjë përpos standardeve më të larta. Do të kërkojmë vetëm diçka që do t’i bëjë të gjithë krenarë që e kanë këtë gjë në mes të Europës. Në të kundërt nuk do të ndodhë.

Edhe diçka tjetër sepse dua të sigurohem që nuk ka një tjetër keqinterpretim të formulimit. Na duhet të shfuqizojmë ligjin për investimet strategjike që është diçka për të cilin kemi disa kohë për të cilin kemi rënë dakord sepse ky ligj e ka përmbushur misionin e vet dhe po punojmë ngushtësisht edhe me Komisionin për atë që do ta zëvendësojë këtë ligj. Kur bëhet fjalë për ligjin tjetër, nuk kemi asgjë për të shfuqizuar edhe pse ka pasur një rezolutë në Parlamentin Europian që ka kërkuar këtë, por na duhet të trajtojmë ligjin mbështetur në të gjitha standardet europiane dhe të ndryshojmë brenda këtij ligji, gjithçka që nuk është në pajtim me standardet europiane sepse shfuqizimi nënkupton anulim dhe ligji për investimet strategjike do të shfuqizohet dhe anulohet, ndërkohë që ligji për zonat e mbrojtura, është një nga ligjet më të mira që kemi. Është një ligj për të cilin kemi punuar shumë fort për ta hartuar.

Ligji i parë në vend për zonat e mbrojtura sepse nuk kishim një të tillë më parë, ashtu siç nuk kishim shumë gjëra të tjera më parë dhe na duhet të trajtojmë pjesë specifike të cilat duhet të jenë në pajtim të plotë më standardet e Bashkimit Europian dhe edhe për këtë, ndërkohë që flasim, po punojmë me Komisionin, por shfuqizim nuk është një fjalë që e marrim si fjalë për të qenë në përputhje. Nuk është shfuqizim. Është miratim 100% në përputhje me standardet europiane. Shfuqizimi është për ligjin për investimet strategjike, janë dy gjëra të ndryshme, thjesht sa për mos humbur në përkthim, siç ndodh.

Lexoni edhe: