Jemini për sherrin në protestë: Të mos përçahemi nga individë që paguhen, në shesh deri në largimin e Ramës

Në Tiranë po zhvillohet protesta e 79-të kundër qeverisë “Rama 4”, ndërsa një prej figurave tashmë të njohura të protestave, Agron Jemini, i njohur si “Agroni i Flamurit”, ka reaguar pas incidentit të ndodhur mbrëmjen e kaluar. Jemini deklaroi se ngjarja nuk do ta ndalë të jetë pjesë e protestave dhe i bëri thirrje Policisë së Shtetit të marrë masat e nevojshme për garantimin e sigurisë.

“Incidenti që ndodhi mbrëmë nuk më frikëson. I bëj thirrje Policisë së Shtetit të marrë masat dhe të vazhdojë punën”, u shpreh ai. Duke folur para protestuesve, Jemini tha se asnjë sulm nuk do ta largojë nga sheshi. Ai deklaroi se do të vijojë të protestojë çdo natë, deri në dorëheqjen e kryeministrit Edi Rama.

“Çdo sulm që do të vijë përballë meje, nuk do më shmangë nga sheshi. Do jem çdo natë me protestuesit deri në dorëheqjen e Ramës”, tha Jemini. Në mesazhin e tij, “Agroni i Flamurit” u bëri gjithashtu thirrje protestuesve që të mos bien pre e përçarjeve, duke pretenduar se pas tyre qëndrojnë individë të paguar nga politikanë. “Të mos përçahemi nga individë që paguhen nga politikanët, do t’i mposhtim”, përfundoi ai.