Jorida Tabaku nga majat e Valbonës: “Sa më e vështirë rruga, aq më e bukur sfida”

Deputetja e Partisë Demokratike dhe njëkohësisht Kryetarja e Këshillit Kombëtar të Integrimit/Komisionit për Çështjet e BE-së, Jorida Tabaku, ka zgjedhur ta nisë këtë të diell me një mesazh motivues për ndjekësit e saj në rrjetet sociale, e shoqëruar nga pamjet piktoreske të Alpeve Shqiptare.

Përmes një postimi të shoqëruar me foto nga kreshtat ku shpaloset pamja e maleve të Dragobisë, Tabaku ka ndarë me publikun përshtypjet nga ngjitja në lartësitë e Luginës së Valbonës. Në mesazhin e saj, ajo vë në dukje rëndësinë e përpjekjes dhe qëndrueshmërisë përballë çdo sfide.

Mesazhi i plotë i deputetes:
“Sa më e vështirë rruga, aq më e bukur sfida. Nuk është asnjëherë e thjeshtë të mbërrish aty ku dëshiron, por çdo përpjekje e vështirë e ka shijen e ëmbël në fund. Kur arrin, pamja e shpërblen çdo mund. Lugina e Valbonës, parë nga lart, është madhështore. Po aq madhështore është edhe forca që na shtyn përpara, edhe kur kërkon të dorëzohesh!”

Me këtë publikim, Tabaku përcjell jo vetëm promovimin e bukurisë natyrore të veriut të Shqipërisë, por edhe një mesazh simbolik mbi përballjen me vështirësitë dhe arritjen e objektivave.

AV