Lala dhe Hoxha shpjegojnë pse nuk mund të ekstradohet Artur Shehu nga SHBA

Gazetarët Klodiana Lala dhe Artan Hoxha shpjeguan në emisionin “Të Paekspozuarit” në MCN TV detaje nga jeta në SHBA e Artur Shehut, personit kyç të dosjes “Aruba” dhe të investimit në resortin e Zvërnecit.

Lala tha se ai u përgjua në Aruba dhe më pas udhëtoi në Evropë. Ndërsa Hoxha u shpreh se Shehu nuk mundet të vijë në Shqipëri sepse ka azil politik dhe se është hetuar disa herë nga FBI.

Biseda

Lala: Dyshoj se mund të ekstradohet. Ka azil politik në SHBA. Çfarë përfaqëson ky personazh në SHBA? Nuk e dimë. Dosja thotë se Artur Shehu pasi u përgjua në Aruba, rezulton të ketë udhëtuar në Majorka, në Belgjikë, Holandë, me qëllim për të folur për çështje biznesi që kishin të bënin me drogën, pastrimin e parave, pronat. Ai rezulton të jetë në qendër të tjetërsimit të pronave jo vetëm në Zvërnec, por në të gjithë jugun. Bashkëpunonte me avokatin e familjes dhe zyrtarë vendorë.

Kur Artur Shehu ka filluar planet për të investuar në bregdet, një ndër zonat më të lakmuara është parë Green Coast 4, resorti në Palasë. Në komunikimet me një punonjës të Samir Manes, dërgon foto dhe thotë këtu do të investohet. Janë edhe Koçekët me të njëjtin interes për të invsetuar në këtë zonë dhe do ta bënte përmes Ilir Shtufit, që kishte leje ndërtimi për kulla. Bashkë me Koçekët dalin vëllezërit Vladi.

Hoxha: Artur Shehu jeton në Majami, ka një biznes atje. Kanë shkruar disa herë mediat amerikane. Është hetuar edhe nga FBI-ja disa herë. Ka rezultuar i pastër nga hetimet. Duke qenë se ka stastusin e azilantit nuk mundet të vijë në Shqipëri, por vjen rrotull sepse humb statusin e azilantit. Familjarët e tij, gruaja dhe fëmijët kanë përfituar dokumente amerikane, një vëlla e ka në Kanada, por nuk e di statusin e azilantit, me çfarë dokumentesh lëviz ai. Është qytetar amerikan dhe SHBA-të nuk ekstradojnë qytetarë amerikanë në Republikën e Shqipërisë. Marrëveshje që në kohën e Zogut, por në anën tjetër, SPAK e ka hetuar, edhe Antimafia e ka hetuar, por statusi i tij është qytetar i lirë.