Meidani pas vendimit të Hagës: Drejtësia e munguar duhet të jepet

Ish-Presidenti i Shqipërisë, Rexhep Meidani, ka reaguar pas vendimit të Gjykatës Speciale në Hagë për dënimin me 81 vite burgim, në total, të katër ish-drejtuesve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.

Në reagimin e tij, Meidani ka vënë në pikëpyetje përfaqësimin e Kosovës në procesin gjyqësor, duke theksuar se asnjë prej gjyqtarëve të trupit gjykues nuk është nga Kosova.

Sipas tij, fakti që vendimi është dhënë nga një gjykatë jashtë territorit të Kosovës dhe pa përfaqësim të drejtpërdrejtë të saj është një prej çështjeve që e shqetëson më shumë.

“Aktgjykimi i sotëm në Hagë mban emrin e popullit të Kosovës, por asnjë gjyqtar i atij trupi gjykues nuk i përket Kosovës e nuk e kupton atë, dhe seanca nuk u mbajt as në tokën e saj”, është shprehur Meidani.

Ai ka nënvizuar se vendimi është i shkallës së parë dhe se procesi gjyqësor vijon, duke kërkuar që, sipas tij, drejtësia e munguar të jepet në vijim të procesit.

Meidani ka rikujtuar gjithashtu përvojën e tij gjatë luftës në Kosovë, fillimisht si pedagog i Universitetit të Prishtinës dhe më pas si President i Shqipërisë. Ai ka përshkruar dëbimet e shqiptarëve të Kosovës dhe represionin e regjimit të Slobodan Millosheviçit, duke argumentuar se konteksti historik i luftës nuk duhet të lihet mënjanë.

“Kosova dhe populli i saj ishin viktimë e dhunës së shtetit serb, jo palë e barabartë me agresorin”, ka shkruar ish-Presidenti.
Në reagimin e tij, Meidani ka folur edhe për katër ish-krerët e UÇK-së, duke deklaruar se vendimi gjyqësor, sipas tij, nuk mund t’ua ndryshojë vendin që ata kanë në historinë e Kosovës.

Ai ka theksuar se i ka njohur personalisht Thaçin, Veselin, Krasniqin dhe Selimin dhe ka shprehur bindjen e tij se ata nuk janë njerëz të aftë për veprimtari kriminale, siç përshkruhen në akuzat dhe vendimet e gjykatës.

Në fund të reagimit, Meidani ka kërkuar që dënimet të kundërshtohen përmes të gjitha mjeteve ligjore në dispozicion. Ai i është drejtuar edhe Kuvendit të Kosovës, duke argumentuar se institucioni duhet të mbajë qëndrim ndaj mënyrës se si funksionon aktualisht Gjykata Speciale.

“Besnikëria ndaj asaj rruge nuk kërkon heshtje kur diçka na duket e padrejtë. Kërkon që t’u kërkojmë aleatëve tanë Perëndimorë që t’u përmbahen, në çdo rast dhe për çdo popull, parimeve mbi të cilat është ngritur demokracia, mbi të gjitha: liria, barazia dhe drejtësia për të gjithë, pa përjashtim”, ka deklaruar Meidani.

Ai ka përfunduar reagimin duke shprehur mbështetjen për katër ish-drejtuesit e UÇK-së dhe familjet e tyre, të cilat prej vitesh janë përfshirë në procesin gjyqësor në Hagë.