Ministri i Drejtësisë, Toni Gogu, mori pjesë në Samitin Ndërkombëtar të Drejtësisë në Stamboll, ku përfaqësues nga mbi 70 vende diskutuan për sfidat e drejtësisë, përfshirë inteligjencën artificiale, krimin kibernetik dhe migracionin. Gogu ndau përvojën e Shqipërisë me reformën në drejtësi, duke theksuar rëndësinë e transparencës dhe llogaridhënies për forcimin e besimit të qytetarëve. Ministri njoftoi gjithashtu se Tirana do të mirëpresë Kongresin Botëror të Ligjit në vitin 2027.
Postimi i plotë
Dy ditë të frytshme në Samitin Ndërkombëtar të Drejtësisë në Stamboll.
Me kolegë nga mbi 70 vende të botës, folëm për të ardhmen e drejtësisë: nga inteligjenca artificiale dhe krimi kibernetik, te migracioni dhe mbrojtja e dinjitetit njerëzor. Sfida që nuk njohin kufij dhe që mund t’i përballojmë vetëm së bashku.
Ndava me krenari përvojën e Shqipërisë me reformën në drejtësi, një rrugë e vështirë, por që na mësoi se besimi i qytetarëve fitohet çdo ditë, me llogaridhënie dhe transparencë.
Faleminderit Turqisë, mike e vërtetë e shqiptarëve, për mikpritjen e ngrohtë!
Dialogu vazhdon, dhe vitin e ardhshëm bota e drejtësisë do të takohet në Tiranë, në Kongresin Botëror të Ligjit 2027.