Avokati Spartak Ngjela ka kritikuar drejtimin e Partisë Demokratike nga Sali Berisha, duke argumentuar se opozita nuk ka gjasa të rikthehet në pushtet nën udhëheqjen e tij. “I kanë rënë aksionet PD. E dinë ata që me Saliun s’vijnë dot në pushtet”, u shpreh Ngjela në ”Report TV”, duke shtuar se Berisha ka interesat e veta për të qëndruar në krye të partisë.
Duke folur për raportin mes dy forcave kryesore politike, Ngjela tha se një rikthim i PD-së në pushtet lidhet edhe me dobësimin e Partisë Socialiste. Megjithatë, sipas tij, deri tani nuk ka shenja se PS-ja ka humbur mbështetjen në atë masë që do t’i krijonte opozitës një mundësi reale për të fituar.
“Që të ngrihet PD, duhet të bjerë PS. PS nuk i kanë rënë ndonjëherë aksionet”, tha avokati. Ngjela komentoi gjithashtu mungesën e Sali Berishës në pritjen e organizuar nga ambasadori amerikan Eric Wendt, duke e lidhur këtë situatë me statusin e tij “non grata” në Shtetet e Bashkuara.
Sipas avokatit, ky përcaktim përbën një pengesë në marrëdhëniet e kreut të PD-së me përfaqësuesit amerikanë. “Ai është non grata në Amerikë, nuk e presin dot”, u shpreh Ngjela. Ai pretendoi gjithashtu se një personalitet që do të takohej me Berishën mund të përballej me pasoja ligjore në SHBA, nëse një veprim i tillë do të përbënte shkelje të ligjit amerikan.