Përgatitjet për Euro U21, kryetari Beci: Shkodra do të jetë një skenë e denjë për këtë ngjarje

Kryetari i Bashkisë së Shkodrës, Benet Beci, ka nisur përgatitjet për organizimin e ndeshjeve të Kampionatit Evropian U21 që do të zhvillohen në qytet në vitin 2027. Beci zhvilloi një takim me Guillaume Poisson, Drejtues i Operacioneve të Turneve në UEFA, me të cilin diskutoi mbi organizimin e kompeticionit dhe përgatitjet që duhet të kryhen për Shkodrën, e cila do të jetë një prej qyteteve pritëse të kampionatit.

Në qendër të diskutimeve ishin aspektet organizative dhe përgatitjet e nevojshme për zhvillimin e ndeshjeve në stadiumin “Loro Boriçi”. Përmes një reagimi, Beci e cilësoi ardhjen e Kampionatit Evropian U21 në Shkodër si një ngjarje të rëndësishme për qytetin, duke vënë në dukje traditën sportive dhe pasionin e shkodranëve për futbollin.

“Me traditën e saj të madhe sportive, pasionin e jashtëzakonshëm për futbollin dhe mikpritjen që e karakterizon, Shkodra do të jetë një skenë e denjë për këtë ngjarje të rëndësishme ndërkombëtare”, deklaroi Beci.

Postimi i plotë

Në 2027 futbolli evropian do të vijë në Shkodër!

Qyteti ynë do të jetë pjesë e Kampionatit Evropian U21, një prej ngjarjeve më të rëndësishme të futbollit evropian për të rinjtë, me stadiumin “Loro Boriçi” që do të mirëpresë ndeshjet e këtij kompeticioni.

Në kuadër të përgatitjeve zhvillova një takim me Guillaume Poisson, Drejtues i Operacioneve të Turneve në UEFA, me të cilin diskutuam mbi organizimin e kampionatit dhe përgatitjet e nevojshme për Shkodrën si një prej qyteteve pritëse.

Me traditën e saj të madhe sportive, pasionin e jashtëzakonshëm për futbollin dhe mikpritjen që e karakterizon, Shkodra do të jetë një skenë e denjë për këtë ngjarje të rëndësishme ndërkombëtare.