Prefekti i Tiranës, Shkëlqim Hajdari, ka zhvilluar një takim koordinues për forcimin e masave parandaluese dhe rritjen e kapaciteteve të reagimit ndaj zjarreve gjatë sezonit veror.
Në këtë aktivitet morën pjesë drejtues të Njësive Administrative që administrojnë sipërfaqe pyjore dhe frutore në territorin e tyre, përfaqësues të Administratës së Zonave të Mbrojtura (ADZM), Agjencisë së Parqeve dhe Rekreacionit, Policisë Bashkiake, Policisë së Shtetit, si dhe institucioneve të tjera të përfshira në menaxhimin e emergjencave civile.
Të pranishëm në takim ishin edhe Drejtori i Përgjithshëm i Agjencisë Kombëtare të Mbrojtjes Civile, Haki Çako, Drejtori i Përgjithshëm i Shërbimit Zjarrfikës, Arben Cara, si dhe drejtuesi i Shërbimit të Mbrojtjes nga Zjarri dhe Shpëtimit (MZSH) Tiranë, Shkëlqim Goxhaj.
Gjatë takimit u theksua rëndësia e rolit të Njësive Administrative si strukturat më pranë komunitetit, të cilat kanë mundësinë të identifikojnë, raportojnë dhe reagojnë në kohë reale ndaj situatave emergjente. Pjesëmarrësit vlerësuan se bashkëpunimi ndërinstitucional dhe angazhimi i strukturave vendore mbeten elementë kyç në parandalimin dhe menaxhimin e zjarreve.
Një vëmendje e veçantë iu kushtua edhe rolit të grupeve vullnetare të mbrojtjes civile, të cilat konsiderohen një mbështetje e rëndësishme për strukturat operacionale në nivel bashkie dhe qarku. Sipas drejtuesve të pranishëm, përfshirja e komunitetit në përballimin e emergjencave rrit ndjeshëm efektivitetin e reagimit në terren.
Në përfundim të takimit, forcat vullnetare të Njësive Administrative iu nënshtruan një trajnimi praktik të zhvilluar nga specialistët e Drejtorisë së MZSH-së. Gjatë demonstrimeve në terren të hapur u prezantuan teknikat e ndërhyrjes dhe procedurat për shuarjen e zjarreve, me fokus sigurinë dhe koordinimin e veprimeve në raste emergjente.
Gjithashtu, Shërbimi i MZSH Tiranë shpërndau paketa me pajisje individuale mbrojtëse kundër zjarrit për çdo Njësi Administrative, si pjesë e masave për rritjen e gatishmërisë dhe forcimin e kapaciteteve vendore në përballimin e zjarreve dhe emergjencave të tjera civile.
Ky aktivitet shënon nisjen e një qasjeje më gjithëpërfshirëse në mbrojtjen nga zjarret, ku krahas forcave zjarrfikëse, rol aktiv do të kenë institucionet vendore, grupet vullnetare dhe vetë komuniteti.