Në Universitetin e Arteve u promovua sot libri “E djathta drejt së ardhmes”, vepër e reformatorit italian Pinuccio Tatarella, organizuar nga fondacioni italian “Tatarella”.
Në fjalën e mbajtur në këtë aktivitet, kryetari i Partisë Demokratike, Sali Berisha vlerësoi se Tatarella dhe Berlusconi janë arkitektët e qendrës së djathtë fituese në Itali dhe Europë.
“Kam pasur rastin ta njoh dhe ta takoj shumë herë Pinuccio Tatarellën. Që në fillim kam vënë re respektin e tij për Shqipërinë dhe shqiptarët. Do t’i mbetem përherë mirënjohës, sepse me zërin e tij në qeverinë italiane, në Itali, por edhe në Parlamentin Europian, Pinuccio Tatarella ishte një avokat i shqiptarëve, i Shqipërisë dhe i programit të Partisë Demokratike”, vlerësoi Berisha.
Ky libër, sipas tij, “përfaqëson një pjesë të punës së madhe që Pinuccio Tatarella bëri për të reformuar jo vetëm një parti të djathtë në Itali, por të gjithë qendrën e djathtë dhe skenën politike italiane pas rënies së Murit të Berlinit”.
“Hyrja e Silvio Berlusconit në skenën politike italiane dhe gjenialiteti reformues i Pinuccio Tatarellës arritën të krijonin një qendër të djathtë fituese, një lokomotivë të vërtetë të përparimit të Italisë dhe të Europës”, tha Berisha.
Pinuccio Tatarella ishte reformatori i lëvizjes së vjetër “Movimento Sociale Italiano”, duke e shndërruar atë në “Alleanza Nazionale’” me një lidership të ri dhe të ri në moshë, duke vendosur në themelet e kësaj force politike vlera universale si përgjegjësia ndaj institucioneve dhe toleranca.
Berisha theksoi se ai arriti ta bënte këtë parti një nga shtyllat më të rëndësishme të qendrës së djathtë italiane.
“Tatarella udhëhiqte parlamentarët italianë në Parlamentin Europian. Ai i jepte gjithmonë një mbështetje të madhe grupit të Partisë Popullore Europiane në këtë parlament. Shumë herë përfaqësuesit e tij votonin së bashku me deputetët e ‘Forza Italia’ dhe të ‘Lega Nord’, duke luajtur kështu një rol shumë të rëndësishëm në vendimmarrjet e Parlamentit Europian në Bruksel”, tha Berisha.
Zv/ Presidenti i Fondacionit “Tatarella”, Fabrizio Tatarella theksoi se Fondacioni “Tatarella” ruan 20 mijë libra të Pinuccio-s dhe të Salvatore Tatarella-s dhe përmban arkivin historik të së djathtës italiane dhe të Lëvizjes Sociale Italiane dhe të Alleanza Nazionale.
“Pinuccio Tatarella ka qenë arkitekti i kthesës së së djathtës në Itali. Në Itali kishte një të djathtë postfashiste që ishte Lëvizja Sociale Italiane dhe Pinuccio Tatarella e transformoi të djathtën italiane në një të djathtë demokratike, qeverisëse”, shtoi ai.