Protesta më 8 tetor, Arapi paralajmëron Berishën: Mos u fut në mes turmës për të provokuar

Protesta e 8 tetorit përballë Kryeministrisë pritet të shoqërohet me tensione, teksa përveç qytetarëve, në të njëjtën zonë ka paralajmëruar tubim edhe PD-ja. Eksperti i marrëdhënieve ndërkombëtare, Floriar Arapi, shprehu shqetësimin për mundësinë e përplasjeve dhe provokimeve gjatë protestës. Arapi i bëri thirrje Sali Berishës të mos ndërhyjë në turmën e protestuesve dhe të shmangë çdo situatë që mund të tensionojë atmosferën.

“Është një kauzë e drejtë, qoftë nga PD-ja, qoftë nga socialistët e zhgënjyer dhe nga protesta në tërësinë e vet”, u shpreh Arapi në ”A2cnn”. Ai solli si skenar të mundshëm një përfshirje të drejtpërdrejtë të Berishës në turmë, duke theksuar se një veprim i tillë mund të krijojë provokime. “Nëse Berisha vjen atje dhe futet në mes të protestuesve dhe thotë ‘mos shani Saliun’, ‘mos thoni Berisha në burg’, dhe me disa të fortë atje që vijnë e fryhen, ky është diversion”, tha eksperti.

Arapi vlerëson se një protestë e zhvilluar paralelisht nga PD-ja nuk do të përbënte problem, për sa kohë që nuk ndërhyn në tubimin e qytetarëve. “Le të protestojmë paralelisht. Ne nuk do t’i themi Berishës apo çdo demokrati që mos protesto kundër qeverisë. Por nëse futet midis njerëzve dhe bën diversion, ky është problem, krijon provokime”, deklaroi ai.

Sipas Arapit, pas një periudhe jashtë vëmendjes politike, Berisha synon të rikthehet në qendër të skenës. Ai argumentoi se protesta e 8 tetorit mund t’i shërbejë këtij qëllimi, në një kohë kur sipas tij rolin e opozitës po e marrin gjithnjë e më shumë qytetarët. “Berisha ka dalë nga skena dhe do të rifutet në skenë, sepse s’po e luan më rolin e opozitës”, përfundoi Arapi.