Protestat nga PD, Noka: Rama është bërë problem te ndërkombëtarët. Po i ngushtohet laku

Sekretar i Përgjithshëm i PD-së, Flamur Noka thotë se kryeministri Edi Rama është bërë një problem për komunitetin ndërkombëtar.

Për të zgjidhja e vetme është largimi i qeverisë aktuale dhe arritja e një marrëveshjeje politike që fokuson dy qëllime kryesore: sigurimin e zgjedhjeve të lira dhe çeljen e procesit të integrimit europian, të cilin Rama, sipas tij, e ka bllokuar.

”Opozita ka paralajmëruar një maratonë protestash për të rritur presionin e brendshëm, ndërsa presioni i jashtëm ndaj Ramës po shtohet vazhdimisht”,-tha Noka në ”A2cnn”.

Ai shtoi se ndërkombëtarët po rrisin gradualisht presionin mbi kryeministrin, duke e bërë atë një problem jo vetëm për Shqipërinë, por edhe për faktorin ndërkombëtar. ”Unë besoj se i zoti e nxjerr gomarin nga balta. Ndërkombëtarët kanë bërë detyrën e tyre, tani është radha jonë. Nuk do të ndalemi deri sa të gjendet një zgjidhje politike”,–përfundoi Noka.