PS kërkon “Këshill Emërimi” për gjyqtarët

 Propozimet e mazhorancës prekin jo vetëm kriteret për anëtarët e Gjykatës së Lartë, por bëjnë detyrim ligjor ngritjen e një trupe këshillimore pranë presidentit, që do të quhet Këshilli për Emërimet. Ky këshill është menduar të ketë në përbërje kryetarin e Gjykatës së Lartë, kryetarin e Gjykatës Kushtetuese, ministrin e Drejtësisë, prokurorin e përgjithshëm, nënkryetarin e Këshillit të Lartë të Drejtësisë, kryetarin e Dhomës Kombëtare të Avokatisë dhe një anëtar të Gjykatës së Lartë. Ndryshimet propozojnë që të jetë kjo strukturë, e cila bën vlerësimin e kandidatëve dhe në bazë të raportit të saj, presidenti të bëjë përzgjedhjen. Sipas propozuesve, qëllimi i ngritjes së kësaj trupe këshillimore pranë presidentit, me 7 anëtarë, përfaqësues të gjyqësorit, është të ulë ndikimin eventual politik në procesin e dekretimit të kandidatëve për anëtarë të Gjykatës së Lartë. Deri tani, mazhoranca i ka rrëzuar presidentit çdo dekret për Gjykatën e Lartë, duke e cilësuar procesin jotransparent dhe shumë subjektiv, si dhe duke lënë ende tre vende vakante në këtë institucion. Ligji për instancën më të lartë gjyqësore të vendit është pjesë e paketës për reformën në drejtësi dhe për këtë shkak, këto ndryshime mund të risjellin në skenë akuzat e opozitës, se ato po bëhen pa konsultimin e partnerëve ndërkombëtarë me qëllim uzurpimin e institucioneve të pavarura nga mazhoranca dhe kufizimin e kompetencave të presidentit. Para pak ditësh, mazhoranca votoi edhe ngritjen e komisionit parlamentar për reformën në drejtësi, por këto ndryshime janë llogaritur të kalojnë me proçedurë normale parlamentare dhe jo si pjesë e paketës. Hera e fundit kur ligji i Gjykatës së Lartë u ndryshua ishte 30 maji i vitit të kaluar dhe si një nga 3 kushtet për marrjen e statusit të vendit kandidat, ai u miratua me konsensus në Parlamentin e dominuar nga demokratët. Partia Socialiste ka kërkuar dje vendosjen në eficencë të komisionit për reformën në drejtësi, duke propozuar katër emrat që do të jenë pjesë e komisionit të posaçëm parlamentar për reformën në drejtësi. Grupi Parlamentar i Partisë Socialiste i mbledhur sot në drejtimin e kryeministrit Edi Rama ka vendosur që deputetët Fatmir Xhafaj, Armando Subashi, Ulsi Manja dhe Vasilika Hysi të jenë pjesë e këtij komisioni.  Në përbërje të komisioni do të ketë 11 anëtare; 6 nga shumica (2 jane te LSI), 5 nga opozita, ku 3 anëtare do t’i përkasin PD, 1 PR dhe 1 PDIU. Fatmir Xhafa do të jetë kryetari i këtij komisioni me mandat 6- mujor, ndërkohë që zëvendës-kryetari do t’i përkasë Partisë Demokratike. Kryetari Fatmir Xhafa tha se, e do opozitën pjesë të këtij komisioni, por s’mund të presë pafund.