PS kërkon përjashtimin me 60 ditë, Bardhi: Bëjini 4 vjet, por frikën e Ramës nuk keni për ta zhdukur dot

Partia Socialiste kërkon përjashtimin me 60 ditë të kreut të grupit parlamentar të PD-së Gazment Bardhi dhe po aq ditë për deputetin demokrat Klevis Balliu, për veprimet e kryera gjatë seancës pleanre ku u votua me 85 vota PRO Reforma Territoriale. Në një reagim Bardhi akuzon mazhorancën për shkelje të rregulloreve dhe Kushtetutës.

“Jo 60 ditë, por bëjini 4 vjet! Shkelni rregulloret dhe Kushtetutën! Bëni gjithçka që keni në dorë. Prapëseprapë, frikën e Edi Ramës nuk keni për ta zhdukur dot”, shkruan Bardhi.

Në reagimin e tij, Bardhi e lidh këtë masë me atë që e cilëson si frikë të kryeministrit Edi Rama përballë qytetarëve. Ai akuzon kreun e qeverisë se ka nevojë për votën e Belinda Ballukut, të cilën e përshkruan si person të akuzuar për korrupsion, për të çuar përpara vendime që dëmtojnë qytetarët dhe 15 bashki. “Llogaritë nuk i ka me deputetët e opozitës, por me qytetarët, të cilët i ka braktisur dhe i ka dhunuar prej 13 vitesh”, përfundon Bardhi reagimin e tij.

Postimi i plotë

Jo 60 ditë, por bëjini 4 vjet! Shkelni rregulloret dhe Kushtetutën! Bëni gjithçka që keni në dorë. Prapëseprapë, frikën e Edi Ramës nuk keni për ta zhdukur dot.

Edi Rama është i vetmi kryeministër që ka nevojë për votën e një personi të akuzuar për korrupsion, si Belinda Balluku, për të shkatërruar jetën e qytetarëve dhe për të fshirë nga harta 15 bashki.

Është i vetmi kryeministër në botë që shkon në Kuvend për të votuar, i rrethuar nga 40 efektivë të Gardës së Republikës. Sepse ai e di më mirë se kushdo se llogaritë nuk i ka me deputetët e opozitës, por me qytetarët, të cilët i ka braktisur dhe i ka dhunuar prej 13 vitesh!