Sporti i kanoes mes bukurive magjike të Bunës, Rama poston pamjet

Lumi Buna është gjithnjë e më shumë në vëmendje të turistëve, pasi ofron mundësi për sporte ujore, si edhe relaks apo aktivitete në natyre. Sporti i kanoes në lumin Buna po fiton gjithnjë e më shumë vëmendje vitet e fundit, si pjesë e turizmit sportiv dhe aktiviteteve në natyrë në veri të vendit.

Kryeministri Edi Rama ndau sot në rrjetet sociale pamje nga ushtrimi i këtij sporti në lumin magjik të Bunës, i kthyer në një oaz për shumë vizitorë që zgjedhin freskinë e ujërave të tij këtë pranverë.

Vizitorët që zgjedhin Bunën mahniten nga bukuritë natyrore, por kanë mundësinë të vëzhgojnë edhe shpendë të ndryshëm folezues në këtë zonë. Lumi Buna buron nga Liqeni i Shkodrës dhe derdhet në detin Adriatik. Buna ndodhet pranë qytetit të Shkodrës, midis kodrës së Kalasë Rozafa dhe Malit të Taraboshit. Lumi ka gjatësi 44 km dhe rrjedh përgjatë fushave të Bregut të Bunës ku përfshihen Fusha e Anamalit, Fusha e Trushit dhe fusha e Velipojës.