Vlora Hyseni ”mollë sherri” në Kuvend, Balla-Berishës: Rruga jonë është pavarësia e drejtësisë

Kreu i grupit parlamentar i PS, Taulant Balla ka reaguar në Kuvend ndaj deklaratave të Sali Berishës lidhur me hetimet për ish-drejtoreshën e Shërbimit Informativ të Shtetit, Vlora Hyseni. Nga foltorja e Kuvendit, Balla deklaroi se çështja duhet të hetohet dhe të zbardhet nga organet e drejtësisë, duke theksuar se politika nuk duhet të marrë përsipër kompetencat e prokurorisë.

Balla shprehu mbështetjen e mazhorancës për Prokurorinë e Posaçme dhe tha se institucionet e drejtësisë duhet të kenë hapësirën e nevojshme për të kryer hetimet pa ndërhyrje politike. Sipas tij, koha kur politika merrej me gjykimin e çështjeve dhe përgjegjësive penale ka përfunduar me reformën në drejtësi.

“Ne presim që organi i akuzës ta hetojë dhe ta zbardhë deri në fund”, deklaroi Balla, duke shtuar se çdo çështje që lidhet me përgjegjësi penale duhet t’i drejtohet prokurorisë dhe jo të trajtohet përmes mekanizmave politikë. Ai u ndal edhe te kërkesat për komisione hetimore apo forma të tjera të kontrollit parlamentar, duke argumentuar se Kuvendi nuk mund të zëvendësojë institucionet e drejtësisë. “Ne jemi palë. Ne jemi deputetë”, tha Balla, duke nënvizuar se verifikimi i provave, përcaktimi i fakteve penale dhe identifikimi i përgjegjësive individuale janë detyra të prokurorisë dhe gjykatës.

Kreu i grupit socialist e konsideroi hetimin e zyrtarëve të nivelit të lartë si një tregues se sistemi i drejtësisë po funksionon dhe se reforma në drejtësi ka sjellë një ndryshim të rëndësishëm në raportin mes politikës dhe institucioneve të drejtësisë. Balla solli në vëmendje edhe një rast personal, duke thënë se dosje që, sipas tij, ishin mbyllur më herët nga prokuroria, u rihapën dhe u hetuan nga SPAK. Ai theksoi se nuk do të komentojë vendimin e gjykatës dhe se përgjegjësia për vendimmarrjen duhet t’u lihet institucioneve përkatëse.