Dy njerëz të mëdhenj për një mision: “Shqiptarinë”

Përgjatë gjithë historisë kanë qenë veprimet e një personi të vetëm që kanë frymëzuar njerëzit anekënd botës.  Duket se një fuqi të tillë mbart edhe figura e misionarit amerikan, Charles Telford Erickson, unikalitetin e misionit të cilit nuk rresht së bëri jehonë në Shqipëri  diplomati dhe studiuesi, Mal Berisha.

Pas shumë stacioneve përfshirë së fundmi edhe Bibliotekën Kombëtare të Prishtinës në muajin tetor, ndalesa e radhës ishte për të qyteti i Lezhës së Skënderbeut dhe Besëlidhjes.

Në prag të Festës së Pavarësisë, z. Mal Berisha, i shoqëruar nga familja e tij, ishin të ftuar në qytetin e Lezhës. Këtu z. Berisha mbajti një kumtesë për Erickson duke nxjerrë në pah fakte që e bëjnë këtë figurë emblematike të pandashme me historinë shqiptare.

“Misionarët janë njerëz me cilësi të veçanta ku spikatin sakrifica, përkushtimi, vetëmohimi, humanizmi… Mendoj se sa më shumë të njohim jetën e këtyre njerëzve aq më shumë e ofrojmë veten me ta dhe me njerëzit e thjeshtë e në nevojë. Charles Telford Erickson është një prej tyre,” nënvizoi Z. Berisha në prezantimin e tij para të ftuarve midis të cilëve binte në sy Kryebashkiaku i Lezhës, Z. Fran Frrokaj, përfaqësuesja e kulturës në Bashkinë e Lezhës, zj. Ema Osmani, deputeti Eduart Ndocaj si dhe Presidenti i Aleancës Evangjeliste Shqiptare, z. Ylli H. Doci.

Fuqia transformuese e Erickson dhe ndikimi që ai ka pasur në jetën dhe historinë e Shqipërisë mbetet unike, shtoi z. Berisha duke pranuar se ai është bërë “misionar” i misionarit për bërjen të njohur të përpjekjeve të tij për të mirën e Shqipërisë. “Prandaj e konsideroj të pambaruar misionin deri sa të arrij që shumica e shqiptarëve ta njohin jetën dhe misionin e tij në shërbim të shqiptarëve dhe për rrjedhojë ta duan shqiptarinë qoftë edhe një të qintën e asaj që e ka dashur Erickson. Ky mision sado te duket si përsëritje e vetvetes, vazhdon…Dita e sotme ishte dëshmi e kesaj.” Duket qartë se Z. Berisha do ta vazhdojë me zell këtë mision sepse siç thotë edhe ai vetë “Sa herë i kthehem jetës së tij gjej diçka të re frymëzuese për patriotizmën shqiptare.”