Piktura shqiptare – Albanologu Robert Elsie prezanton piktorin francez, Zhan-Leon Zherom

Albanologu Robert Elsie po vazhdon të prezantojë kulturën shqiptare me anë të faqes së tij në internet. Gjetjet e tij gjithmonë janë të hatashme. Ai prezanton pikturat shqiptare të piktorit francez Zhan-Leon Zherom. Jeniçerë shqiptarë në Kairo (Egjipt) të veshur në fustanella të bardha.

Piktori francez, Zhan-Leon Zherom (Jean-Léon Gérôme) (1824-1904) lindi në Vesulë  dhe studioi në Paris. Në vitin 1856 ai udhëtoi për në Egjipt me mikun e tij, skulptorin Ogyst Bartoldi (Auguste Bartholdi) (1834-1904) – i cili më vonë u bë me famë si projektuesi i Statujës së Lirisë në New York – dhe u mahnit nga ngjyrat dhe aromat e Lindjes. Ky udhëtim qe vendimtar për suksesin e mëvonshëm të Zheromit si piktor orientalist, dhe shqiptarët zinin një vend të rëndësishëm në artin e tij. Në shekullin e nëntëmbëdhjetë, Egjipti ishte pjesë e Perandorisë Osmane nën sundimin e dinastisë shqiptare të themeluar nga Mehmet Ali Pasha (1769-1849). Për këtë arsye, shumë shqiptarë, ndër të cilët shumë anëtarë të trupave të Jeniçerëve, ishin vendosur në brigjet e Nilit.20170110213601695-copy

Zheromi ishte i magjepsur nga ecja e tyre krenare, nga shkëlqimi i armëve, dhe nga veshjet e mahnitshme, sidomos nga fustanellat e bardha që mbanin. Deri në fund të jetës vazhdoi të pikturonte figura shqiptare. Kjo faqe i ofron lexuesit një përzgjedhje të pikturave shqiptare të Leon Zheromit. Për informacione të mëtejshme, lexuesi mund të konsultojë edhe librin e Luan Ramës ”Shqiptarët e Léon Gérôme” / ”Les Albanais de Léon Gérôme” (Tiranë 2016).

(M.M)