Nga Armand Maho
Njeriu më i interesuar për të pasur një pjesëmarrje të ulët në zgjedhje natyrisht është Edi Rama. KQZ me anë të kreut të saj Ilirjan Celibashi bëri me dije dje se të prekurit me COVID, nuk do të mund të votojnë, pasi institucioni që ai drejton nuk ka asnjë mundësi që t’i sigurojë infrastrukturën kësaj kategorie.
Në fakt, është një problem që si zgjidhje kërkon ndërhyrjen e qeverisë e jo burimet e pakta të KQZ dhe për këtë Celibashi s’mund të fajësohet. Shqipëria bëhet kështu, ndoshta i vetmi vend demokratik në botë që privon këtë kategori personash nga një e drejtë kushtetuese, dhe kjo jo për faj të tyre.
Ky lloj ngërçi vjen në një moment kur sapo kanë mbaruar votimet në Kosovë, që u organizuan brenda 45 ditëve. Qeveria e atjeshme bëri të pamundurën që asnjë shtetas mos mbetej pa votuar. Grupet e votimit të pajisura me veshjen anticovid pushtuan të gjitha mediat. Ata siguruan votën edhe në spitalet e infektivit. Të njëjtën gjë bëri dhe Maqedonia e Veriut, në zgjedhjet e korrikut të vitit të kaluar. Kjo ka ndodhur në të gjitha vendet ku liderët e tyre kanë sadopak respekt për shtetin dhe Kushtetutën.
Vetëm në Shqipëri është rilindja ajo që bën sikur ka shpikur rrotën. Fakt është se shtetarë të tipit Rama dhe shpura që e shoqërojnë vetëm për votën s’kanë respekt. Ata mund të kenë afeksion për cilindo kriminel, trafikant, oligark që i shërben pushtetit të tyre. I ftojnë dhe në qeverisje e vendimmarrje. Por kanë zero konsideratë për mendimin dhe vendimmarrjen qytetare, aq më tepër kur ai mund t’i rrezikojë pushtetin.
Në fakt, kategoria e të prekurve me COVID, janë dhe pjesa e popullsisë më e revoltuar me qeverisjen. Rrallë e tek mund të gjesh ndonjë person që ka kaluar infeksionin, që mos akuzojë qeverinë direkt për mungesën e vëmendjes. Rama natyrisht, nuk ka si iu çon grupe votimi personave që po paguajnë qimet e kokës në sistemin shëndetësor që ai ka ngritur.
Ai e di fort mirë se ç’do të thotë kjo.
Qartazi është një votë kundër pushtetit. Është një votë kundër infermierit që kërkon 50 mijë lekë për çdo injeksion kur ta kryen në shtëpi. Është një votë kundër “Tireve” që gëlojnë në spitale.
Është një votë për kompensimin e munguar të ilaçeve dhe holluesve të gjakut që kanë rrënuar ekonominë e çdokujt që e ka kaluar në mënyrë mesatare, dhe ka fundosur atë të atyre personave që e kanë kaluar rëndë.
Të prekurit me covid janë ata që e provuan më shumë nga të gjithë mashtrimin elektoral të shëndetësisë falas.
Nga dhjetori deri në ditët që po flasim numri i të prekurve nga Covid ka shënuar një rritje me 65 mijë, dhe trendi vazhdon të rritet. Aktualisht sipas të dhënave zyrtare janë rreth 40 mijë persona të infektuar, dhe deri më 25 prill trendi sipas parashikimeve të ekspertëve do vazhdojë të rritet. Rama, në këtë rast nuk mendon si shtetar por si një hesapçi i vogël elektoral që synon të shuajë çdo zë kundër, të privojë çdo votë që ai mendon se nuk është në favorin e tij.
Por a mund t’ia shpëtojnë pushtetin Ramës këto veprime të vogla dhe pa moral? A do mundet ai që me cic-mice llogarish elektorale, ecejake drejt Rinasit për një grusht vaksina të fshijë abuzimin me paratë për publike? A do mundet ai që të mbulojë tenderat dhe PPP që u jep miqve të tij me dhjetëfishin e kostos, në një kohë që shumë shqiptarë luftojnë me jetën.
A do mundet ai që duke privuar nga e drejta për të votuar atë pjesë shqiptarësh që fati i keq i ra të kenë Rilindjen në krye të punëve në këtë ditë të zezë të shpëtojë këtë sistem korruptiv që ka ngritur. A do mundet ai që të fshijë të pabërat e tetë viteve në këto 50 e ca ditë që kanë mbetur deri nga përballja e 25 prillit. Vështirë, shumë vështirë!/ Mapo.al