Kryeministri në detyrë i Kosovës, Albin Kurti, tha se thirrjet e partive që mandatin e kaluar ishin në opozitë, që anëtarët e ekzekutivit që janë zgjedhur deputetë të japin dorëheqje formale nga Qeveria, janë thirrje “të pamatura”, që do të rrezikonin një vakum institucional.
Në mbledhjen e ekzekutivit, Kurti tha se Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës dhe Lista Serbe, me votën e tyre kundër raportit të Komisionit për verifikimin e mandateve, pamundësuan vazhdimin e seancës konstituive të martën.
“Në thelb, ata që nuk pranuan formalisht ta marrin mandatin e deputetit, po kërkojnë nga unë që formalisht të mos jem kryeministër”, tha ai.
Çfarë ndodhi në seancën konstituive të Kuvendit?Kurti përsëriti qëndrimin se ai dhe kabineti qeveritar janë në detyrë që nga 23 marsi, kur ekzekutivi ka përmbushur mandatin e rregullt katërvjeçar.
Ai tha se ligjet dhe Kushtetua thonë se ekzekutivi nga kjo ditë deri në ditën e Qeverisë së re mbetet në detyrë, në rol kujdestar e me kompetenca të kufizuara, duke shtuar se statusin e ekzekutivit të tij ai bëri me dije Kuvendit në letrën që i dërgoi më 15 prill, në ditën e seancës konstituive.
“Më shumë se kaq nuk është e mundur të jepet dorëheqje, më shumë se kaq do të ishte braktisje e institucionit, do të ishte vakum institucional, papërgjegjësi politike dhe rrezikim i sigurisë kombëtare. Është kërkesë dhe insistim – thënë së buti – i pamatur për të lënë shtëpinë pa zot shtëpie”, tha Kurti.
Sipas Kurtit, edhe mbledhja e mbajtur sot është detyrim, sipas ligjit, pasi sipas tij, “shteti nuk mund të ketë vakum në qeverisje, Qeveria nuk mund të ketë ndalesë funksionimi”.
PDK, LDK dhe AAK kanë thënë se Kurti dhe anëtarët e Qeverisë, që janë zgjedhur deputetë në zgjedhjet e 9 shkurtit, është dashur të japin dorëheqje më herët, duke argumentuar se ata nuk mund të bëjnë betimin si deputetë kur njëkohësisht janë kryeministër, përkatësisht ministra.
Sipas kryeministrit në detyrë Kurti, edhe në të kaluarën ka pasur raste kur shteti është udhëhequr nga Qeveri në detyrë deri në zgjedhjen e një ekzekutivi të ri.
Lëvizja Vetëvendosje e Albin Kurtit ka fituar 48 mandate në legjislaturën e nëntë. Partitë shqiptare, që kanë fituar mandate në zgjedhjet e 9 shkurtit, e kanë akuzuar LVV-në se po e zvarrit procesin e krijimit të institucioneve, duke argumentuar se partia e Kurtit nuk i ka numrat për votimin e kryeparlamentarit të ri e as të Qeverisë së re.
“Si fitues të padiskutueshëm të zgjedhjeve jemi shumë të interesuar që të ecim përpara drejt formimit të institucioneve të legjislaturës së nëntë, dhe atë sa më parë, e menjëherë”, tha Kurti gjatë mbledhjes së Qeverisë.
Seanca për konstituimin e legjislaturës së nëntë të Kuvendit, e cila u ndëpre afër dy orë pasi nisi.
LVV-ja më herët është deklaruar kundër një bashkëpunimi me një nga partitë shqiptare, por së voni e ka pranuar se nuk mund ta bëjë Qeverinë vetëm me pakicat joserbe.
Partitë e mëdha shqiptare janë shprehur kundër bashkëpunimit me LVV-në, por Nisma Socialdemokrate – që ka fituar tre deputetë – nuk ka vendosur vija të kuqe për asnjë parti, ndonëse ka thënë se ende nuk ka një marrëveshje me partinë e Kurtit./REL/