Celibashi: Votën e diasporës do ta lexojnë përfaqësues të opozitës dhe maxhorancës

Komisioneri Shtetëror i Zgjedhjeve, Ilirjan Celibashi, deklaroi sot se do të dërgojë një draft në Kuvend që mesa duket do të dakordësohet nga të dyja palët.

Celibashi ka deklaruar se do t’i kërkohet qeverisë të zgjasë vlefshmërinë e dokumenteve të identifikimit për diasporën.

“Janë 400 mijë shtetas që u skadon identifikimi elektronik dhe 600 mijë shtetas që u skadon pasaporta. Duke marrë në konsideratë këta numra dhe çfarë është diskutuar me përfaqësues të partive politike, vlerësojmë që është e përligjur që t’i kërkojmë qeverisë që të zgjasë me akt normativ afatin e vlefshmërisë së dokumenteve të identifikimit të atyre që jetojnë jashtë Shqipërisë”, tha Celibashi.

PS dhe PD duken më afër një pakti në Kuvend për ndryshimin e Kodit Zgjedhor lidhur me zgjatjen e afateve të dokumenteve të skaduara dhe përfshirjen e partive politike në numërimin e votave të diasporës.