Fatmir Xhafaj debate me zv.ministren e Shëndetësisë: Të ashpërsohen masat për vaksinimin e qytetarëve!

Gjatë diskutimeve në Komisionin e Ligjeve, deputeti socialist Fatmir Xhafaj kërkoi marrjen e masave detyruese për vaksinimin e qytetarëve kundër Covid 19 dhe kërkoi nga zëvendësministrja, Eugena Tomini, e pranishme në mbledhje, nëse legjislativi duhet të bëjë ndonjë gjë në lidhje me këtë çështje.

“Çfarë duhet bërë për ta përmirësuar, a ka nevoje për masa më të ashpra për tu vaksinuar qytetarët? Duke qenë se unë i përkas kësaj qasjeje, çfarë mund të bëjë Kuvendi për ta mbështetur këtë proces për të rritur mbulesën vaksinale?”, tha Xhafaj.

Zëvendësministrja Tomini u shpreh se masat shtrënguese vlerësohen nga Komiteti i Ekspertëve në varësi të situatës së shifrave dhe janë ata më pas, të cilët marrin vendimet për masat shtrënguese, ashtu sikurse vendosën për vaksinimin e detyruar të administratës publike dhe punonjësve të supermarketeve.