Gjiknuri: Në zgjedhje do kemi parti të tjera përballë, nëse opozita bojkoton

Ish-ministri, Damian Gjiknuri deklaron se në rast se opozita reale nuk hyn në zgjedhjet vendore, të tjera forca politike dhe individë do të marrin pjesë. Në cilësinë e përfaqësuesit të PS për reformën zgjedhore, Gjiknuri deklaron se PD dhe LSI mund të marrin pjesë në komision duke mbajtur rolin e vëzhguesit!

Në një intervistë për Klan, Gjiknuri pohon se nuk ka asnjë komunikim me selinë blu nëse do të pranojnë të bëhen pjesë në rolin e vëzhguesit në Komisionin e Posaçëm të Reformës Zgjedhore, por me të drejta të plota për të propozuar.

Përfaqësuesit e opozitës së re në Parlament i kërkuan në kor Kryeministrit ndryshimin e sistemit zgjedhor, çka kërkohet dhe nga aleatët e vegjël të Lulzim Bashës. Por kjo nuk duket të jetë në krye të axhendës së socialistëve për këtë reformë. “Pse krijohet një grup në Parlament dhe kërkon këtë, s’mund të bëjnë ndryshime që kërkojnë dhe ndërhyrje në Kushtetutë, kjo do konsensus të gjerë”, tha Gjiknuri.

Po ashtu ai hedh poshtë dhe propozimin e bërë nga Bashkim Fino, që bëri thirrje për zëvendësimin e anëtarëve të propozuar nga PS në KZAZ me njerëz nga shoqëria civile.

A do të futen socialistët të vetëm në zgjedhje nëse demokratët nuk futen në garën e 30 Qeshorit?

“Kush tha të vetëm? Mund të ketë individë, parti të tjera ose grupime të tjera që do të duan të futen”,- tha ai. Gjiknuri pranon se iniciativa për të ulur në tryezë për ndryshimet elektorale është e diktuar nga fakti se është vendosur si kusht nga BE për çeljen e negociatave. Por paralelisht me punën në komision, shumica do të lobojë me vendet e BE për t’i bindur se vullneti i tyre ekziston, por ndryshimet kërkojnë kohë ndaj kjo reformë të mos jetë ndër kushtet që mund ta penalizojnë vendin në Qershor kur pritet progres-raporti i Komisionit Europian.