Rama: Shteti është i qëndrueshëm kur ka barazi para ligjit

Kryeministri Edi Rama dhe ministri i Brendshëm, Ervin Hoxha ishin sot pjesë e prezantimit të anketimit për matjen e perceptimit qytetar mbi nivelin e sigurisë në vend dhe besimit te Policia e Shtetit.

Rama u shpreh se siguria nuk është një çështje që i përket vetëm policisë, por një sërë institucionesh.

“Kjo e sotmja, arsye rëndësishme për të ndarë disa mendime. I vetmi shtet i qëndrueshëm është ai ku qytetarët janë të barabartë para ligjit. Kurrë më shumë se sot Shqipëria nuk ka qenë e mobilizuar për të arritur nivelin e barazisë para ligjit, që është konfirmuar si fakt i pamohueshëm nga çelja e negociatave me BE-në, të cilat nuk janë dhuratë dhe as vendimmarrje thjesht politike, por konstatim i progresit të bërë në radhë të parë në rritjen e nivelit të barazinë para ligjit.
Nga ana tjetër na vendos përballë sfidës së rritjes së vazhdueshme të nivelit të barazisë që rrit qëndrueshmërinë e lirive individuale dhe sundimit të ligjit.
Sot erdha këtu sepse Këshilli Kombëtar i sigurisë në komunitet meriton vlerësimin se siguria nuk është atribut vetëm i policisë por edhe bashkive, shëndetësisë dhe vetë qytetarëve. Duke nisur në radhë të parë nga çdo prind e madje qytetarët janë baza e sigurisë.
Këshilli është një organizëm i krijuar rishtazi, fundvitin e shkuar me vendim të posaçëm të qeverisë si strukturë me objektiva e pritshmëri me koordinimin e qeverisjes lokale dhe qendrore”, tha mes të tjerash Rama.