“Kur të vish ti në bashki të Shkodrës, a ke me i hek njerëzit prej pune?!”

Në takime me bashkëqytetarë, jo rrallë më pyesin: kur të vish ti në bashki, a ke me i hek njerëzit prej pune?

Mendoj se ka shumë njerëz të aftë në punë dhe me përvojë në bashkinë Shkodër. Me disa prej tyre më ka lidh puna personalisht dhe kam shumë respekt për angazhimin dhe kontributin e tyre.

Di gjithashtu që ka një pjesë tjetër kryesisht drejtues të cilët nuk janë aty në bazë përvoje apo meritash.

Në asnjë administratë që kam drejtuar deri tani, dhe besoj me qindra vetë mund ta dëshmojnë, simpatitë politike nuk kanë qenë përcaktuese për ndërtimin e skuadrave fituese. Profesionalizmi, integriteti dhe motivimi për punë janë kriteret më të rëndësishme. Mendoj se jemi me fat që në Shkodër kemi një komunitet të rinjsh e të rejash të mirëshkolluar, që besoj se do ta pranojnë sfidën për transformimin e Shkodrës. Duhet me afru njerëz të aftë dhe me potencial, të cilët do të jenë “ushtria” e zhvillimit të Shkodrës. Motivi për të ndërtu një bashki të mirë dhe për të pasur sukses e rezultate ndërtohet në rradhë të parë duke pasë njerëzit, bashkëpunëtorët dhe duke ruajtur të gjitha mundësitë që ke për mirëqenien e njerëzve me të cilët punon.