Lajm i fundit, Prifti dhe Doshi bëjnë gati kandidatët për Shkodrën dhe Fierin

Janë të dy emra që nuk marrin vota nga partia, por i japin asaj. Dritan Prifti dhe Tom Doshi janë dy politikanë që çdo parti, sado e “mbaruar” të jetë ajo, do të kishte shumë dëshirë t’i kishte në radhët e saj.

Nisur nga ky fakt, duket se dy ortakët në biznes kanë nisur levizjet për të gjetur një “parti taksi” me siglën e se cilës do të angazhohen në zgjedhjet lokale të 21 qershorit. Mediat bënë të ditur sot se Prifti ka konfirmuar se po punon për organizimin e një koalicioni tjetër të majtë jashtë atij të Partisë Socialiste me Levizjen Socialiste për Integrim, duke shpjeguar edhe një pjesë të qëllimit të takimit në “Bllok” me kreun e PSD-së Skendër Gjinushi.

Burime të Albeu.com konfirmojnë se Dritan Prifti synon që nëpërmjet PSD-së të kandidojë një ish-deputet të Partisë Socialiste në qarkun e Fierit duke shfrytëzuar edhe peshën e tij elektorale aty. Burime të Albeu.com theksojnë se bëhet fjalë për një ish-deputet i nxjerrë nga listat e Fierit për zgjedhjet e 23 qershorit me urdhër të Kryeministrit Rama.

Nëse përfundojnë me sukses negociatat me Gjinushin për të krijuar një pol të tretë apo qoftë edhe për të marrë siglën e PSD-së për kandidatin e tij, Prifti bëhet shumë problematik në Fier për PS-LSI. I vetëm ai ka arritur të marrë më shumë se 9 mijë vota në këtë qark si kandidat i pavarur në zgjedhjet e 23 qershorit. Tom Doshi ka qenë një tjetër makineri votash për PS-në në qarkun e Shkodrës, aq sa më së shumti PD-ja ia faturon atij shkërmoqjen totale të saj në këtë qark në 23 qershor. Ka pak rendësi nëse kandidati i Tomës do të listohet në koalicion apo vetëm nga një parti, pasi i mjafton vetëm mbështetja e këtij të fundit. U duk se zgjedhjet lokale do të jenë një formalitet për PS-LSI por duket se ata po sfidohen keqaz në Fier dhe Shkodër nga dy figura politike që kanë treguar se kanë mbështetje të gjerë në elektorat.