Meta takohet me dy zyrtarët e bashkisë Arbëreshe: T’i ndihmojmë të ruajnë identitetin kombëtar

Presidenti Ilir Meta ka pritur në institucionin e presidencës dy zyrtarë të Bashkisë Arbëreshe të Ururit ku tha se ishte gjithmonë emocionuese të takohej me përfaqësues të komunitetit Arbëresh.

Meta pranoi ftesën e tyre për të vizituar bashkinë e Ururit në të ardhmen ndërsa shtoi se ishte jetike që arbëreshët të ndihmoheshin për të ruajtur identitetin kombëtar.

Postimi i Plotë nga Ilir Meta:

Takimet me përfaqësues të komunitetit shumë të dashur arbëresh janë gjithmonë emocionuese. I lumtur të prisja ngrohtësisht Nënkryetarin e Bashkisë Arbëreshe të Ururit, Molise, z.Emiliano Plescia dhe Këshilltarin për Kulturën të kësaj Bashkie, z.Roberto Anzivino.

Është mbresëlënëse dhe frymëzuese të njihesh me përpjekjet e tyre për të trashëguar brez pas brezi gjuhën, kulturën dhe traditat e “Motit të Madh” të Gjergj Kastrioti Skënderbeut, që meritojnë sa më parë të bëhen pjesë e UNESCO.

Jetike për mbrojtjen dhe forcimin e identitetit tonë kombëtar të mbështesim dhe ndihmojmë arbëreshët të ruajnë këtë pasuri të vyer historike dhe kulturore, vlerë e përbashkët e Shqipërisë dhe Italisë mike.

E mirëprita me shumë kënaqësi ftesën për të vizituar Bashkinë e Ururit dhe do të kontribuoj me shumë dashuri për pasurimin e bibliotekës së saj me libra dhe botime në gjuhën shqipe.