Ministri Blendi Gonxhe: Thethi mahnit me bukuritë e tij natyrore

“Thethi, i cili jo vetëm që mahnit me bukuritë e tij natyrore,, por edhe ruan pasuri të rralla të trashëgimisë kulturore.
Kisha e Thethit në Fushë Theth, e ndërtuar në vitin 1892, është një nga ndërtimet e para monumentale të këtij vendbanimi. Ajo ka shërbyer si qendër shpirtërore dhe kulturore, duke pritur në qelën e saj famullitarin At’ Shtjefën Gjeçovin. Pikërisht këtu, në vitin 1917, u hap shkolla e parë në Theth, me At’ Gjeçovin si mësuesin e parë.
Kulla e Ngujimit, e ndërtuar në shekullin XIX, është një tjetër monument kulture i rëndësishëm që na lidh me traditat dhe kodet e jetës së maleve.
Kulla e Lulash Keqit, dikur muzeu etnografik i Dukagjinit, ofron një pasqyrë të trashëgimisë së pasur të kësaj zone dhe është po ashtu monument kulture i kategorisë së parë.
Me peizazhe që të lënë pa frymë, ajër të pastër dhe një ndjesi qetësie unike, Thethi është një thesar që meriton të vizitohet gjatë gjithë vitit”, shkruan ministri Blendi Gonxhe në një postim në rrjetet sociale, ku ka ndarë edhe disa pamje.