Patozi rrëfen mungesën e Topallit në listën “anti-Basha”

Astrit Patozi ka folur në një intervistë për ”News 24”, për mungesën e disa emrave të njohur si kritikë të Lulzim Bashës në platformën e Lëvizjes për pingritjen e PD-së. I pyetur përse në këtë listë mungojnë emrat e Topallit, Imamit, Rulit etj, Patozi tha se ky dokument është nisja e lëvizjes.

”Për sa kohë platforma është një dokument dhe përderisa qëndron e hapur i mbyll diskutimet për emrat. Unë s’kam tagrin të flas sepse jam një nga nënshkruesit. Ky dokument është nisja e një lëvizjeje. Unë kam respekt për çdo koleg, por çdo emër që përmendet është apo s’është e sposton vëmendjen nga dokumenti”, tha Patozi.

Ai është pyetur për marrëdhëniet e tij me ish-nënkryetaren tjetër të PD-së Jozefina Topalli.

”Kam marrëdhënie shumë korrekte si me shumë kolegë të tjerë. Për publikun s’kanë asnjë lloj interesi marrëdhëniet personale. A kontaktoj me të? Sigurisht që po. Nuk kanë rëndësi marrëdhëniet mes politikanëve. Unë sigurisht kam kontakt me çdo figurë dhe personalitet të PD-së dhe do vijoj të jem në kontakt me të gjithë dhe në nivele të ulëta dhe për anëtarësinë”, tha Patozi.