PD bllokon Komisionet, Balla-socialistëve: Miratoni çdo akt

Ashtu sikurse u bë me dije, deputetët e PD-së pas bojkotit ndaj punimeve të Komisoneve Parlamentare, ishin në Komisionin e Medias. Mbledhja nisi me tension pas qëndrimit të PD-së për të folur vetëm për video-përgjimin e vëllait të ministrit të Brendshëm, Fatmir Xhafaj, por e kundërshtuar nga deputetët e PS-së, pasi çështja sipas tyre nuk i përket rendit të ditës.

Pas kërkesës së PD-së se nuk do të ketë seanca normale të punimeve të Komisioneve dhe në Kuvend, kjo derisa ministri Xhafaj të japë dorëheqjen, mësohet se kreu i grupit parlamentar të PS-së, Taulant Balla mblodhi deputetët socialistë. Balla u ka kërkuar socialistëve të miratojnë çdo akt të parashikuar në mbledhjen e komisioneve, pavarësisht zhurmës së opozitës.

Porosia është dhënë gjatë një mbledhje të tij me deputetët e komisioneve të ekonomisë dhe shëndetësisë, të cilët sipas axhendës parlamentare kanë të parashikuar mbledhje këtë të martë.

“Kemi përgjegjësinë për të qeverisur vendin. E dimë që PD kërkon të bllokojë rrugën tonë europiane. Por ne duhet të vijojmë përgjegjësinë tonë. Komisionet sot të vijojne sipas axhendës”, mësohet të jetë shprehur Balla.