PD kërkon ”kokën” e deputetit të PDIU, flet Rakipi: E kaluara ime në Itali

Partia Demokratike i kërkon Prokurorisë së Përgjithshme dhe KQZ-së verifikimin e formularit të vetëdeklarimit për dy deputetë të Kuvendit, Aqif Rakipi dhe Gjetan Gjetani. Sipas shkresave të PD-së drejtuar këtyre institucioneve, ka të dhëna informale se këta deputetë janë në kushtet e ndalimit për të kandiduar apo zgjedhur pasi kanë rekorde kriminale në Itali.

”Për këtë arsye kërkojmë nga ana juaj që në zbatim të detyrimit të parashikuar nga neni 8 i këtij ligji, të bëni verifikimin e plotë të të dhënave. Kjo kërkesë e jona, bëhet në kushtet kur pavarësisht fakteve të njohura botërisht, institucioni juaj nuk ka kërkuar verifikimin e plotë të të dhënave kryesisht, në përputhje me pikën 4 të nenit 8 të ligjit nr 138/2015”.

Menjëherë pasi PD-ja hodhi dyshime për të kaluarën e tij në Itali, deputeti i PDIU në Elbasan, Aqif Rakipi mohoi problemet me drejtësinë atje. Në një prononcim për Panorama, deputeti tha se ishte verifikuar më parë për të kaluarën e tij dhe se nuk kishte rezultuar asgjë.

“As kam asnjë lloj problemi me Italinë. PD atë punë ka, s’ka me ca të merret edhe merret me mua. Të shofi pjesën e vet, si Lul Basha dhe ato të tjerët atje se i kanë rekordet kriminale këtu në Shqipëri. Unë s’kam asgjë në Itali. E ka shpallur prokuroria për mua, kur i kanë marrë verifikimet nga shteti italian dhe ka rezultuar që s’kam asgjë. Të bjeri provat nëse ka dhe pastaj flasim, nëse ka prova okej”,-u shpreh Aqif Rakipi.