Presidenti Ilir Meta nga familja Rugova te kryeministri Haradinaj

Ilir Meta është që dje në Prishtinë. Fillimisht ka vizituar familjen Rugova. Dhe me pas me drejtuesit kryesor të shtetit të Kosovës. Sot ka postuar foto me kryeministrin legjendar Haradinaj.

Pas takimit në Kosovë me familjen e Presidentit Rugova, zoti Meta ka postuar këtë tekst dhe dy foto. Ai shkruan se “Të dashur miq, kënaqësi të takohesha sot në Prishtinë me familjen e dashur të Presidentit Rugova, për të kujtuar veprën e tij të pavdekshme. Urtësia dhe largpamësia e tij na duhen edhe sot, po aq sa dje”.

Në foto: Presidenti Meta me familjen e Presidentit Rugova

Ndërsa sot Presidenti ka takuar kryeministrin Haradinaj ku kanë dalë në sfondin e borës së Prishtinës dhe me pas një postim në Facebook nga Ilir Meta me shënimin:

Mirëdita të dashur miq!
Nga Prishtina ju uroj një javë të mbarë!

Në foto: Ilir Meta dhe Ramush Haradinaj në Prishtinë

Presidenti Meta kërkon nga qeveria dhe opozita në Kosovë të gjejnë zgjidhje të mençura

Presidenti i Republikës së Shqipërisë,  Ilir Meta ka deklaruar se institucionet e Kosovës duhet të gjejnë zgjidhje të mençura dhe të përafrojnë vendin me integrimet evropiane.

Këto komente, Presidenti Meta i bëri gjatë vizitës në Kosovë, ku u takua edhe me Kryeministrin e Kosovës, Ramush Haradinaj.

Presidenti Meta u shpreh se gjatë këtij takimi ka diskutuar me z. Haradinaj kryesisht në lidhje me perspektivën evropiane të Kosovës.

“Shpresoj shumë në angazhimin e mëtejshëm edhe të Kryeministrit Haradinaj dhe të gjithë Qeverisë, por edhe të opozitës për të dhënë zgjidhje të mençura për të gjitha ato çështje të cilat do ta forcojnë pozitën ndërkombëtare të Kosovës. Në këtë drejtim, mund t’i sigurojmë Kosovës për mbështetjen tonë maksimale, gjithmonë në koordinim me Kryeministrin, me Presidentin dhe Parlamentin e Kosovës dhe të gjitha institucionet këtu”, – theksoi Presidenti Meta.

Gjithashtu, Presidenti Meta tha se ndodhet për vizitë në Kosovë në përvjetorin e 12-të të vdekjes së presidentit Ibrahim Rugova, duke theksuar kështu rëndësinë e kujtimit të vlerave të tij.

“Jam këtu për vlerësimin dhe admirimin e veçantë për presidentin Rugova në këtë përvjetor të ndarjes së tij nga jeta dhe theksoj rëndësinë e kujtimit të vlerave të tij. Mezi po presim 17 shkurtin, 10-vjetorin e pavarësisë së Kosovës, si një mundësi për të afirmuar edhe më tej rrugën evropiane dhe euroatlantike të Kosovës”, – u shpreh Presidenti Meta.

Ndërkaq, Kryeministri i Kosovës, z. Ramush Haradinaj tha se qëllimi i Kosovës mbetet integrimi i saj në strukturat euroatlantike, teksa ka nënvizuar edhe pengesat e saj në këtë rrugë.

“Perspektiva euroatlantike e Ballkanit është ajo që na bashkon të gjitha shtete. Por, neve na pengon shumë mosnjohja nga pesë shtete anëtare të Bashkimit Evropian”, – theksoi z. Haradinaj.

“Kjo qasje e BE-së na bën neve të trajtohemi pa një identitet të mirëfilltë. Pra, për dallim nga Shtetet e Bashkuara të Amerikës që na njeh si shtet të pavarur e sovran, Bashkimi Evropian nuk e ka një pozicion të tillë”, – tha Kryeministri i Kosovës.

Haradinaj ka folur dhe në lidhje me paralajmërimet për një përshkallëzim të mundshëm të gjendjes së sigurisë në Kosovë, pas vrasjes së njërit prej liderëve të serbëve të Kosovës, Oliver Ivanoviç.

“Të gjithë mekanizmat e rendit dhe të sigurisë konfirmojnë se situata e sigurisë është e qëndrueshme, e qetë. Vrasja e Ivanoviçit është marrë shumë seriozisht nga të gjitha institucionet tona dhe nuk ka paralajmërime për çfarëdo destabilizimi të Kosovës. Ju e vërejtët që edhe vizita e presidentit Vuçiç kaloi në një atmosferë korrekte, dhe besoj se porosia këtu është e qartë, se përgjegjësitë për zhvillimet në Kosovë i kanë institucionet e saj”, deklaroi Haradinaj.