Kryeministri Edi Rama tha mëngjesin e sotëm se më 11 maj duhet të bëhemi bashkë, jo për t’u bërë socialistë, por për të përcjellë mesazhin e hyrjes në Bashkimin Europian.
“Kështu që diskutimi a ia vlen është kot, i pabazuar ndërsa krijimi i vetëdijes që më 11 maj duhet të krijojmë një bllok kompakt përtej të majtës dhe të djathtës apo ndasive partiake, apo tifozllëkut dhe rendjes pas faneleve të partisë është domosdoshmëri. Duhet ta krijojmë këtë vetëdije së bashku. PS në numrin 5 është vendi për të hedhur votën, jo për t’u bërë të gjithë socialistë, por për të kompaktësuar mesazhin për BE-në dhe mbështetur fuqishëm negociatat, duke krijuar kushtet që edhe më 12 maj, kur të jemi duke numëruar votat dhe të tjerët të jenë duke u marrë me zgjedhjet, ata 1 mijë vajza dhe djem të vazhdojnë të punojnë pa lëkundje që vjen nga impakti i votës. Në një farë mënyre, PS gjendet në vendin dhe kohën e duhur si pika e referimit siç gjendej PD në ’91-92”, u shpreh Rama.
Më tej, Kryeministri tha se Bashkimi Eurpopian miratoi ditën e djeshme fondet e parafinancimit për Maqedoninë e Veriut, ndërsa e njëjta pritet të kryhet sot për Shqipërinë.
“Shpejtësia në marrjen e financimit do të thotë përmbushje e detyrave sipas kalendarit dhe programit, se ne nuk kemi program të dakordësuar për ecurinë e mëtejshme. Bëhet fjalë për 64.5 milionë euro që vijnë drejtpërdrejt nga Bashkimi Europian për Shqipërinë, 30 milionë euro janë për buxhetin e shtetit si mbështetje për reformat e agjendës kombëtare të reformave dhe 34 milionë kalojnë përmes Fondit të Investimeve për Ballkanin në infrastrukturë. Besoj se kjo është një tjetër shenjë shumë e qartë e faktit që ne jemi duke ecur me shpejtësi për t’u anëtarësuar në Bashkimin Europian”, tha Rama.